Qazaqstandyq tennısshi Reseı chempıonyn utty
NUR-SULTAN. QazAqparat – Ústel tennısinen nemis býndeslıgasynda synǵa túsetin qazaqstandyq Kırıll Gerasımenko Werder komandasy sapynda kezekti matchta jeńiske jetti, dep habarlaıdy QazAqparat Ulttyq olımpıada komıtetine silteme jasap.
«Týrnır kestesiniń 9-shy satysynda kele jatqan «Verder» «TTS OE» klýbymen jolyqqan bolatyn. Kezdesý nátıjesinde 3:1 esebimen bremendikter jeńiske jetti. Al Kırıll Gerasımenko Reseı chempıony Lev Katsmandy 3:1 esebimen utty. Osydan soń, qazaqstandyq tennısshiniń komandasy 7-shi satyǵa kóterildi», dep jazady Qazaqstan Respýblıkasy Ulttyq Olımpıadalyq komıteti.
Buǵan deıin Kırıll Gerasımenko Granadadaǵy(Ispanııa) ITTF Challenge Spanish Open kezeńi aıasyndaǵy halyqaralyq jarysta jeńimpaz atandy. Atalǵan jarystyń fınalynda ol Germanııalyq Benedıkt Dýdomen kezdesti.
Tartysty ótken sheshýshi oıyn 7 aınalymǵa sozyldy. Sońǵy kezeńde Gerasımenko 11:7 esebimen jeńiske jetti.
Birinshilik barysynda ol 6 kezdesý ótkizip, qarsylas shaq keltirmegen.
