Qazaqstandyq tennısshi Pragadaǵy týrnırdiń fınalyna shyqty
NUR-SULTAN. QazAqparat – Qazaqstandyq Dmıtrıı Popko Pragadaǵy chellendjer týrnıriniń fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, dúnıejúzilik reıtıngte 181-orynda turǵan, osy jarystyń ekinshi raketkasy bolyp tirkelgen D.Popko jartylaı fınalda argentınalyq Fakýnda Menamen sheberlik baıqasty.
Qazaqstandyq tennısshi 1 saǵat 16 mınýtqa sozylǵan matchta qarsylasyn 6:1, 6:2 esebimen aıqyn basymdylyqpen utty.
D.Popko oıyn barysynda 4 eıs, 5 breıkke qol jetkizdi.
F.Mena bir ǵana breıkpen shekteldi.
«Búgin jaqsy dop berip, tez qımyldadym. Bul maǵan jeńiske jetýime múmkindik berdi. Erteń chehııalyq tennısshimen ótetin fınaldyq báseke ońaıǵa túspeıdi. Óıtkeni ol topyraq tósenishinde keremet oınaıdy, kort ta jaqsy tanys.
Degenmen men de bar kúshimdi salatyn bolamyn», dedi D.Popko.
Osylaısha qazaqstandyq tennısshi sporttyq jolynda ekinshi ret chellendjer dodasynyń fınalyna shyǵyp otyr.
D.Popko fınalda chehııalyq Dalıbor Svrchınamen bas júldeni sarapqa salady.
Eske sala keteıik, budan buryn qazaqstandyq tennısshiniń Pragadaǵy týrnırdiń jartylaı fınalyna shyqqanyn jazǵan bolatynbyz.
Sondaı-aq qazaqstandyq tennısshi E.Rybakına juptyq synda Monreal týrnıriniń jartylaı fınalyna shyqty.
