Qazaqstandyq tennısshi oınaǵan match úzdik dep tanyldy
NUR-SULTAN. QazAqparat – Áıelder tennısi qaýymdastyǵy (WTA) rýmynııalyq Sımona Halep pen qazaqstandyq Elena Rybakına arasynda ótken oıyndy 2020 jyldyń úzdik matchy dep tanydy, dep habarlaıdy QazAqparat tilshisi.
Budan buryn habarlanǵandaı, Dýbaı týrnıriniń fınalynda dúnıejúzilik reıtıngte 19-orynda turǵan E.Rybakına álemniń 2-raketkasy Sımona Halepke jol bergen bolatyn.
Bıylǵy 22 aqpanda asa tartysty ótken kezdesýde Qazaqstannyń birinshi raketkasy E.Rybakına kezinde reıtıngte kósh bastaǵan 2019 jylǵy Ýımbldon týrnıriniń jeńimpazy S.Halepti birinshi sette 6:3 esebimen utty. Ekinshisinde Sımona dál sondaı eseppen ese qaıyrdy.
Úshinshi, sheshýshi partııa taı-breıkke deıin jetip, onda S.Halep 7:6 (7:5) esebimen jeńiske jetti. Bul onyń sporttyq jolyndaǵy 20-synshy tıtýly edi.
Osylaısha 2 saǵat 27 mınýtqa sozylǵan oıynda E.Rybakına álemniń eń tańdaýly tennısshileriniń birimen terezesi teń óner kórsetken edi.
Jyldyń úzdik matchy ataǵyna sondaı-aq Leksıngtonda amerıkalyqtar Serena men Vınýs Ýılıams, Ostravada Belarýs ókili Arına Sobolenko men taǵy bir amerıkalyq Korı Gaýff, Tsınnınnatıde japonııalyq Naomı Osaka men estonııalyq Anett Kontaveıt arasynda ótken oıyndar da usynyldy.
Elena Rybakına 2020 jyldyń qorytyndysy boıynsha eıs sany jóninen álemdegi úzdikter kóshin bastady. Ol ótip bara jatqan jylda 193 ret eıs jasaǵan eken. Ataqty S.Ýılms (178) ekinshi, A.Sobolenko (165) úshinshi orynda.
Rybakına — 193;
Serena Ýılıams — 178;
Sobolenko — 165;
Garbıne Mýgýrýsa — 160;
Djennıfer Bredı — 149;
Sakkarı — 144;
Mertens — 144;
Naomı Osaka — 141;
Karolına Plıshkova — 137;
Ons Jaber — 126.
