Qazaqstandyq tennısshi Mıýnhen týrnıriniń fınalyna shyǵa almady
NUR-SULTAN. QazAqparat – Qazaqstandyq Andreı Golýbev juptyq synda Mıýnhen (Germanııa) ATP 250 týrnıriniń fınalyna shyǵa almady, dep habarlaıdy QazAqparat tilshisi.
A.Golýbev frantsııalyq Fabrıs Martenmen birge jartylaı fınalda brazılııalyq Rafael Matos – ıspanııalyq Davıd Vega-Ernandespen kúsh synasty.
Eki partııa da tartysty órbip, match taǵdyry taı-breıkte sheshildi.
Brazılııalyq-ıspanııalyq jup 7:6 (7:1), 7:6 (7:2) esebimen jeńiske jetti.
Eki saǵatqa jýyq ýaqytqa sozylǵan báseke barysynda qarsylastar bir-birden breık jasady.
Taǵy bir qazaqstandyq Aleksandr Nedovesov pákstandyq Aısam-ýl-Hak Kýreshımen birge Portýgalııadaǵy Eshtorıl ATP 250 dodasynyń jartylaı fınalyna óte almady.
Olar osy jarystyń 1-raketkalary, ulybrıtanııalyq Djeımı Marreı – jańazelandııalyq Maıkl Vınýske ese jiberdi – 4:6, 4:6.
Eske sala keteıik, budan buryn Qazaqstan jasóspirimder quramasynyń ÁCh irikteý kezeńinde úshinshi orynǵa talasatynyn, Elena Rybakınanyń Madrıd týrnırin jeńispen bastaǵanyn jazǵan bolatynbyz.
