Qazaqstandyq tennısshi Mıhaıl Kýkýshkın Reseıde «Chellendjer» serııasynyń týrnırinde fınalǵa shyqty
ASTANA. Shildeniń 24-i. QazAqparat /Murat Jákeev/ - Qazaqstandyq tennısshi Mıhaıl Kýkýshkın Reseıdiń Penza qalasynda ótip jatqan «Chellendjer» serııasynyń týrnırinde fınalǵa shyqty. Endi ol chempıonatta tórtinshi nómirge ıe reseılik Konstantın Kravchýkpen raketka aıqastyrmaqshy.
Eske sala keteıik, jartylaı fınalda týrnırdi birinshi raketkasy M.Kýkýshkın eki sette reseılik Valerıı Rýdnevti jeńdi. Kezdesý nátıjesi: 6:1, 6:2. Onyń aldynda K:Kravchýk belarýstik Vladımır Ignatıkti 6:3, 7:6 upaıymen jeńgen edi.
Penzadaǵy «Chellendjer» serııalyq týrnıriniń júlde qory 50 myń dollardy qurap otyr.
Tennısshi Mıhaıl Kýkýshkın, sondaı-aq, Andreı Golýbev te reseılikter, biraq biraz ýaqyttan beri Qazaqstan úshin oınap júr. Shilde aıynda M.Kýkýshkın Braýnshveıgte (Germanııa) ótkizilgen Nord/LB Open-2010 «Chellendjer» serııasynyń týrnırinde jeńimpaz atanǵan-dy.
M.Kýkýshkın ATR kestesinde 114 orynda tur, al A.Golýbev 79 orynda. Eki tennısshi de Astana qalasynda qyrkúıektiń 17-si men 19-y aralyǵynda ótkiziletin Devıs Kýbogynyń matchynda Shveıtsarııa quramasyna qarsy Qazaqstannyń atynan shyǵady. .
