Qazaqstandyq tennısshi Meksıka týrnırinde jarystyń ekinshi raketkasyn jeńdi

ASTANA. QazAqparat – Qazaqstandyq Denıs Evseev Meksıkada ótip jatqan Pýerto-Valıarta chellendjer týrnırin jeńispen bastady, dep habarlaıdy QazAqparat tilshisi.

Dúnıejúzilik reıtıngte 314-orynda turǵan qazaqstandyq tennısshi bastapqy kezdesýin álemniń 198-inshi, osy jarystyń 2-raketkasy, frantsııalyq Entso Kokomen ótkizdi.

Birinshi partııada frantsııalyq sportshy 6:2 esebimen basym tústi. Esesine ekinshisinde D.Evseev taı-breıkte tarazy basyn ózine aýdardy – 7:6 (7:5). Sosyn sheshýshi, úshinshi partııada qarqynyn údetti – 6:2.

Eki saǵat 17 mınýtqa sozylǵan tartysty báseke barysynda D.Evseev 2 eıspen birge 12 breık-poınttyń beseýin óz esebine jazdy. Qarsylasy 3 eıs, 5 breıkpen (11 breık-poınt) kózge tústi.

D.Evseev shırek fınalǵa shyǵý úshin álemniń 225-raketkasy, argentınalyq Marko Trýngelıtı nemese reıtıngte 269-satydaǵy týnıstik Azız Dýgazdyń bireýimen talasady.

Eske sala keteıik, budan buryn Astanadaǵy týrnırdiń qazaqstandyq tennısshiler úshin sátsiz bastalǵanyn jazǵan bolatynbyz.

Sondaı-aq AQSh-ta ótetin Indıan-Ýells masters týrnıriniń jerebesi tartyldy.