Qazaqstandyq tennısshi K.Kerimbaeva Úndistandaǵy ITF týrnıriniń aqtyq synyna shyqty
ASTANA. 6 jeltoqsan. QazAqparat - Búgin qazaqstandyq tennısshi Kamılá Kerimbaeva Úndistandaǵy jalpy syıaqy qory 25 myń AQSh dollaryna teń ITF serııasyndaǵy týrnırdiń aqtyq synyna shyqty, dep habarlaıdy Qazaqstan tennıs federatsııasynyń baspasóz qyzmeti.
Ol jartylaı fınalda ıtalııalyq sportshy Djoe Barbarıdi 6:2,6:2 esebimen tize búktirdi.
«Búgin oılastyrylǵan taktıkany júzege asyrý meniń qolymnan keldi. Jergilikti klımatqa da úırenisip qaldym. Ázirge bosańsýdyń qajeti joq, sebebi erteń múldem ózgeshe qımyldaý kerek», - dedi Kamılá jartylaı fınaldyq matchtan keıin.
Bunyń aldynda ol úsh kezdesý ótkizip, úsheýinde de qarsylastaryn aıqyn basymdyqpen utqan bolatyn.
