Qazaqstandyq tennısshi Italııadaǵy týrnırdiń shırek fınalyna ótti
ASTANA. QazAqparat – Qazaqstannyń juptyq syndaǵy birinshi, álemniń 20-raketkasy Anna Danılına Parma (Italııa) WTA 250 týrnıriniń shırek fınalyna ótti, dep habarlaıdy QazAqparat tilshisi.
Jarystyń 3-raketkasy bolyp tirkelgen qazaqstandyq tennısshi chehııalyq Djesıka Malechkovamen birge alǵashqy aınalymda ulybrıtanııalyq Emılı Epplton – amerıkalyq Kýınn Glısonmen sheberlik baıqasty.
Qazaqstandyq-chehııalyq jup qarsylastaryn 6:1, 6:0 esebimen bet qaratpaı utty.
Bir saǵatqa jýyq ýaqytqa sozylǵan kezdesý barysynda Danılına men Malechkova 4 eıs jasap, 10 breık-poınttyń altaýyn múltiksiz paıdalandy.
A.Danılına men D.Malechkova jartylaı fınalǵa shyǵý úshin reseılikter Angelına Gabýeva – Anastasııa Zaharova nemese chehııalyqtar Anastasııa Detıýk – Mırıam Kolodzıeeva juptarynyń qaı jeńgenimen talasady.
Eske sala keteıik, budan buryn Aleksandr Býblıktiń álemdik reıtıngide TOP-40-qa jýyqtaǵanyn, qazaqstandyq tennısshiniń Lıssabon týrnırin jeńispen bastaǵanyn jazǵan bolatynbyz.
Sondaı-aq qazaqstandyq tennısshiler Bolgarııadaǵy jarystyń shırek fınalyna shyqty.
Foto: sports.kz
