Qazaqstandyq tennısshi Italııadaǵy Parma týrnıriniń jartylaı fınalyna shyqty
NUR-SULTAN. QazAqparat – Qazaqstandyq tennısshi Aleksandr Nedovesov juptyq synda Parma (Italııa) ATP 250 týrnıriniń jartylaı fınalyna shyqty, dep habarlaıdy QazAqparat tilshisi.
Chehııalyq Roman Jebavymen juptasqan A.Nedovesov shırek fınalda osy jarystyń 1-raketkalary, belgııalyqtar Sander Jılle – Ioran Flıgenmen kezdesýi kerek edi.
Alaıda belgııalyqtar matchqa kelmeı qaldy da, A.Nedovesov pen R.Jebavy oınamastan jartylaı fınalǵa ótti. Endi olar fınalǵa shyǵý úshin ıtalııalyq Sımone Bolellı – argentınalyq Maksımo Gonsales nemese aýstralııalyq Maks Persell – Lıýk Sevıll juptarynyń qaı jeńgenimen talasady.
Juptyq doda fınaly 29 mamyrǵa belgilengen.
Eske sala keteıik, budan buryn qazaqstandyq tennısshiniń Portýgalııadaǵy týrnırdiń shırek fınalyna shyqqanyn jazǵan bolatynbyz. Al ıÝ.Pýtıntseva Strasbýrg týrnıriniń jartylaı fınalyna óte almady.
