Qazaqstandyq tennısshi Ispanııadaǵy týrnırdiń shırek fınalyna ótti
NUR-SULTAN. QazAqparat – Qazaqstandyq, álemniń 250-raketkasy Tımofeı Skatov Sevılıa (Ispanııa) chellendjer týrnıriniń shırek fınalyna ótti, dep habarlaıdy QazAqparat tilshisi.
Qazaqstandyq sportshy ekinshi aınalymda dúnıejúzilik reıtıngte 408-orynda turǵan ıspanııalyq Haver Kosano Barrankomen sheberlik baıqasty.
Birinshi partııada T.Skatov aıqyn basymdylyq tanytty – 6:2.
Ekinshi sette de Tımofeı 2:0 esebimen alǵa ketti. Esep 3:2 bolǵan mezette qarsylasy matchty jalǵastyrýdan bas tartty.
Saǵat jarymǵa jýyq ýaqytqa sozylǵan báseke barysynda T.Skatov eıs jasamaǵanymen, 12 breık-poınttyń tórteýin paıdalandy. Barranko 1 eıs, 1 breıkpen (5 breık-poınt) shekteldi.
Tımofeı Skatov jartylaı fınalǵa shyǵý úshin álemniń 116-ynshy, jarystyń 4-raketkasy, ıspanııalyq Karlos Taberner nemese reıtıngte 971-satydaǵy Polsha ókili Ejı ıAnovıchtiń bireýimen talasady.
Eske sala keteıik, budan buryn qazaqstandyq tennısshiniń Taılandtaǵy jarystyń shırek fınalyna shyqqanyn jazǵan bolatynbyz.
Foto: ktf.kz
