Qazaqstandyq tennısshi Galına Voskoboeva Hansol Korea Open halyqaralyq týrnıriniń jartylaı fınalyna shyqty
ASTANA. 23 qyrkúıek. QazAqparat - Qazaqstandyq tennısshi Galına Voskoboeva júlde qory 220 myń AQSh dollaryn quraıtyn Hansol Korea Open halyqaralyq týrnıriniń jartylaı fınalyna shyqty, dep habarlady QR Tennıs federatsııasynyń baspasóz qyzmetinen.
Seýlde ótip jatqan týrnırdiń shırek fınaldyq kezdesýinde búgin G. Voskoboeva reseılik Vera Dýshevınadan 6:2, 6:3 esebimen basym tústi. Bunyń aldynda atalǵan tennısshiler bir-birimen bes márte kezdesken. Alaıda Voskoboeva onyń tek bireýinde, 2009 jyly Maıamı týrnırinde jeńgen bolatyn.
Endi jartylaı fınaldaǵy jerlesimizdiń kelesi qarsylasy slovenııalyq Polona Hertsog atanady.
Voskoboeva shırek fınaldaǵy jeńisiniń arqasynda ózine týrnırdiń 10 200 AQSh dollar syıaqysy men WTA reıtıngisinde 130 upaıyn qamtamasyz etti.
