Qazaqstandyq tennısshi Frantsııadaǵy jarystyń shırek fınalyna shyqty
NUR-SULTAN. QazAqparat – Qazaqstandyq Anna Danılına jekeleı synda Frantsııadaǵy Bıarrıtse W60 jarysynyń shırek fınalyna shyqty, dep habarlaıdy QazAqparat tilshisi.
Dúnıejúzilik reıtıngte 351-orynda turǵan qazaqstandyq tennısshi bastapqy kezdesýin álemniń 445-raketkasy, frantsııalyq Sara Tsakarevıchpen ótkizdi.
Eki saǵat 31 mınýtqa sozylǵan matchta A.Danılına 4:6, 6:3, 6:4 esebimen jeńiske jetti.
Qazaqstandyq sportshynyń ekinshi matchy da tartysty ótti. Ol bul joly 2 saǵat 40 mınýtqa sozylǵan básekede álemniń 187-raketkasy, shveıtsarııalyq Ioanna Tsýgerdi 4:6, 7:6 (9:7), 6:4 esebimen joldan taıdyrdy.
A.Danılına jartylaı fınalǵa shyǵý úshin reıtıngte 509-satydaǵy frantsııalyq Lıýsı Ngýen-Tanmen talasady. Ol álemniń 159-ynshy, osy dodanyń 2-raketkasy, belgııalyq Isalın Bonavantıýrdi utyp ketti – 5:7, 6:3, 6:1.
Qazaqstannyń birinshi raketkalary Elena Rybakına men Aleksandr Býblık jankúıerlerin qýanta almady.
A.Býblık Shtýtgart (Germanııa) ATP 250 týrnıriniń ekinshi aınalymynda álemniń burynǵy birinshi raketkasy, «Úlken dýlyǵa» jarysynyń úsh dúrkin chempıony, ulybrıtanııalyq Endı Marreıge jol berdi – 3:6, 6:7 (4:7). Ekinshi partııada esep 5:3 bolyp, setke dop bergen A.Býblık sol múmkindigin paıdalana almady.
E.Rybakına Hertogenbos (Nıderlandy) dodasynyń ekinshi aınalymynda amerıkalyq Shelbı Rodjersten utylyp qaldy – 2:6, 4:6.
Sóıtip, ekeýi de shırek fınalǵa shyǵa almady.
Eske sala keteıik, budan buryn tennısten Qazaqstan balalar quramasynyń Azııa chempıonatynyń fınaldyq kezeńine shyqqanyn jazǵan bolatynbyz.
