Qazaqstandyq tennısshi Frantsııadaǵy týrnırdiń shırek fınalyna shyqty
NUR-SULTAN. QazAqparat – Qazaqstandyq Grıgorıı Lomakın juptyq synda Blýa (Frantsııa) chellendjer týrnıriniń shırek fınalyna shyqty, dep habarlaıdy QazAqparat tilshisi.
G.Lomakın ýkraınalyq Vladıslav Manafovpen birge bastapqy kezdesýin osy jarystyń birinshi raketkalary, aýstrııalyq Aleksandr Erler – frantsııalyq Albano Olıvettımen ótkizdi.
Qazaqstandyq-ýkraınalyq jup eki saǵatqa jýyq ýaqytqa sozylǵan matchta 7:6 (7:5), 6:7 (4:7), 10:5 esebimen jeńiske jetti.
G.Lomakın men V.Manafov jartylaı fınalǵa shyǵý úshin úndistandyqtar Shrırambalaı Naraıanasvamı – Djıvan Nedýnchejııanmen talasady.
Taǵy bir qazaqstandyq Tımofeı Skatov jekeleı synda ekinshi aınalymda úsh saǵatqa jýyq sozylǵan kezdesýde álemniń 184-inshi, osy dodanyń 7-raketkasy, serbııalyq Nıkola Mıloevıchke qatty qarsylyq kórsetip, 6:4, 4:6, 4:6 esebimen jol berdi. Sóıtip ol shırek fınalǵa shyǵa almaı qaldy.
Qazaqstannyń birinshi, álemniń 37-raketkasy Aleksandr Býblık London ATP 500 týrnıriniń shırek fınalyna óte almady. Ekinshi aınalymda álemniń 17-raketkasy, horvatııalyq Marın Chılıchpen kezdesken ol birinshi partııada taı-breıkte 5:0 esebimen alda turyp, sol múmkindigin paıdalana almady. Aqyry 6:7 (6:8), 5:7 esebimen jeńilip qaldy.
Eske sala keteıik, budan buryn qazaqstandyq tennısshiniń Ispanııadaǵy jarystyń jartylaı fınalyna ótkenin jazǵan bolatynbyz.
