Qazaqstandyq tennısshi Frantsııadaǵy týrnırdiń ekinshi aınalymyna shyqty
ASTANA. QazAqparat – Qazaqstandyq, álemniń 331-raketkasy Beıbit Jýkaev Brest (Frantsııa) chellendjer týrnıriniń ekinshi aınalymyna shyqty, dep habarlaıdy QazAqparat tilshisi.
Qazaqstandyq sportshy atalmysh dodany irikteý saıystarynan bastaǵan edi.
B.Jýkaev irikteý saıystarynyń fınalynda jeńilip qalǵanymen, jarysty uıymdastyrýshylar ony kelmeı qalǵan oıynshynyń ornyna shaqyrdy.
Osylaısha, negizgi týrnırde óner kórsetýge múmkindik alǵan 22 jastaǵy B.Jýkaev alǵashqy aınalymda dúnıejúzilik reıtıngte 571-orynda turǵan frantsııalyq Trıstan Lamazınmen sheberlik baıqasty.
Match óte tartysty ótip, birinshi partııada kort ıesi taı-breıkte sátti oınady – 7:6 (7:5).
Ekinshisinde Beıbit dál sondaı jaǵdaıda ese qaıyrdy – 7:6 (7:2).
Úshinshi, sheshýshi sette breık jasap, alǵa shyqqan qazaqstandyq tennısshi sol basymdylyǵyn saqtap qala aldy – 6:4.
Úsh saǵatqa jýyq ýaqytqa sozylǵan kezdesý barysynda B.Jýkaev 17 eıs jasap, 7 breık-poınttyń ekeýin paıdalandy.
Beıbit Jýkaev júlde qory 67 960 eýroǵa baǵalanǵan dodanyń shırek fınalyna shyǵý úshin álemniń 110-raketkasy, frantsııalyq Gregýar Barrer nemese reıtıngte 206-satydaǵy bolgarııalyq Dımıtar Kýzmanovtyń bireýimen talasady.
Eske sala keteıik, budan buryn Qazaqstannyń úzdik tennısshisi Shveıtsarııa týrnırin sátti bastaǵanyn jazǵan bolatynbyz.
