Qazaqstandyq tennısshi Frantsııada negizgi týrnırge joldama aldy

ASTANA. QazAqparat – Qazaqstandyq, álemniń 343-raketkasy Beıbit Juqaev Frantsııada Lıll qalasynda ótip jatqan chellendjer týrnıriniń irikteý saıysyn sátti ótkizdi, dep habarlaıdy QazAqparat tilshisi.

Aqtaý tennıs mektebiniń túlegi aldymen ońtústikkoreıalyq Djı-Sýn Namdy tartysty básekede 6:1, 6:7 (11:13), 6:3 esebimen utty.

Sodan keıin irikteý saıystarynyń fınalynda álemniń 298-raketkasy, chehııalyq Iones Foreıtekti 6:4, 6:4 esebimen tize búktirip, negizgi jarysqa joldama aldy.

Beıbit Juqaev chellendjer dodasynyń alǵashqy aınalymynda álemniń 99-raketkasy, aýstralııalyq Maks Perselmen sheberlik baıqasady.

Taǵy bir qazaqstandyq, álemniń 275-raketkasy Mıhaıl Kýkýshkın dúnıejúzilik reıtıngte 348-orynda turǵan frantsııalyq Kennı de Sheppermen kezdesedi.

Eske sala keteıik, budan buryn Elena Rybakınanyń Maıamı masters týrnıriniń tórtinshi aınalymyna shyqqanyn jazǵan bolatynbyz.

Sondaı-aq álemniń eks-ekinshi raketkasyn jeńgen Rybakına matchtyń óte aýyr bolǵanyn aıtty.

Qazaqstan jasóspirimderi tennısten álem chempıonatyna irikteý satysyn sátti bastady.