Qazaqstandyq tennısshi Chılıdegi týrnırdiń shırek fınalyna shyqty

ASTANA. QazAqparat – Qazaqstannyń ekinshi, álemniń 144-raketkasy Tımofeı Skatov Chılıdiń Konsepson qalasynda ótip jatqan chellendjer týrnıriniń shırek fınalyna shyqty, dep habarlaıdy QazAqparat tilshisi.

Osy jarystyń 8-raketkasy bolyp tirkelgen Petropavl tennısiniń túlegi ekinshi aınalymda dúnıejúzilik reıtıngide 260-orynda turǵan kolýmbııalyq Nıkolas Mehııamen kúsh synasty.

Qazaqstandyq tennısshi 6:2, 6:2 esebimen jeńiske jetti. Saǵat jarymnan astam ýaqytqa sozylǵan báseke barysynda ol 1 eıs jasap, 9 breık-poınttyń tórteýin óz esebine jazdy.

T.Skatov jartylaı fınalǵa shyǵý úshin álemniń 102-inshi, týrnırdiń 2-raketkasy, chılılik Alehandro Tabılo nemese reıtıngte 206-satydaǵy ıtalııalyq Lýsıano Darderıdiń bireýimen talasady.

Eske sala keteıik, budan buryn Aýstralııa chempıonatynda Elena Rybakınanyń alǵash ret fınalǵa shyqqanyn jazǵan bolatynbyz.

Sondaı-aq E.Rybakına 1 mln astam dollar tabys tapty.

Elena Rybakına alǵash ret úzdik ondyqqa enedi.

Elena Rybakınanyń fınaldaǵy qarsylasy anyqtaldy.

Foto - Qazaqstan tennıs federatsııasynan