Qazaqstandyq tennısshi Aýstralııa týrnırinde jeńiske jetti
ASTANA. QazAqparat - Qazaqstandyq tennısshi Elena Rybakına Lonsestonda (Aýstralııa) ótken ITF týrnıriniń jeńimpazy atandy, dep habarlaıdy QazAqparat tilshisi.
Dúnıejúzilik reıtıngte 169-orynda turǵan E.Rybakına fınalda álemniń 131-raketkasy, reseılik Irına Hromachevamen kúsh synasty.
Birinshi partııada qazaqstandyq sportshy 7:5 esebimen jeńiske jetti. Ekinshi sette esep 3:3 bolǵan mezette reseılik tennısshi kezdesýdi jalǵastyrýdan bas tartty.
Báseke 1 saǵat 14 mınýtqa sozyldy.
Osylaısha, E.Rybakına júlde qory 60 myń AQSh dollaryna baǵalanǵan jarystyń jeńimpazy atandy. Ol týrnır barysynda áýeli aýstralııalyq Neıkta Beıns, osy jarystyń 1-raketkasy, reıtıngte 105-satydaǵy germanııalyq Laýra Zıgemýnd, Taıvan eliniń ókili Chjan Kaıchjen jáne jartylaı fınalda belgııalyq Marına Zanevskaıany tize búktirdi.
Eske sala keteıik, buǵan deıin Astanada ótken Devıs kýbogyna irikteý jarysynda Býblıktiń Qazaqstandy alǵa shyǵarǵanyn jáne Qazaqstan senbi kúni Portýgalııamen juptyq kezdesýinde ese jibergenin jazǵan edik. Degenmen, sheshýshi básekede Kýkýshkın jeńiske jetip, Qazaqstan fınalǵa ótti.
