Qazaqstandyq tennısshi ATP Challenger maýsymy boıynsha erekshe marapatqa ıe boldy
ASTANA. QazAqparat – Qazaqstandyq tennısshi Tımofeı Skatov ATP Challenger maýsymynyń qorytyndysy boıynsha jyl jańalyǵy retinde tanyldy, dep habarlaıdy QazAqparat tilshisi.
Kásibı tennısshiler qaýymdastyǵy (ATP) T.Skatovty 2022 jyly chellendjer týrnırlerinde ózin eń jaqsy qyrynan kórsetken bes oıynshynyń qataryna qosty.
Atalǵan qaýymdastyqtyń resmı saıtynan málim etkenindeı, Parmada (Italııa) óziniń alǵashqy tıtýlyn jeńip alǵan 21 jastaǵy T.Skatov 2022 jyly ATP Challenger Tour jarystarynda chempıon atanǵan jalǵyz qazaqstandyq boldy. Álemniń 142-raketkasy fınalda osyǵan deıin toǵyz matchta qatarynan jeńiske jetken slovakııalyq ıÝzek Kovalıkti utty.
T.Skatov topyraq tósenishindegi korttarda jaqsy óner kórsetti. Bıyl ol Kokımbo, Lıssabon, Braga, Sevılıa, Rozeto-delıa-Abrýtstsı-2 jáne Parma chellendjer dodalarynda jartylaı fınalǵa deıin jetti. Qyrkúıek pen qazanda qazaqstandyq tennısshi 16 oıynnyń 14-inde jeńiske jetti. Al Coquimbo Challenger jarysynda dúnıejúzilik reıtıngte ózinen áldeqaıda joǵary turǵan, álemniń 71-raketkasy Federıko Korıany tize búktirdi.
Eske sala keteıik, budan buryn tennısten Aleksandr Býblıktiń Elena Rybakınanyń Ýımbldondaǵy jeńisin joǵary baǵalaǵanyn jazǵan bolatynbyz.
Sondaı-aq Qazaqstan quramasy United Cup komandalyq týrnırine qatysyp jatyr.
Foto: ktf.kz
