Qazaqstandyq tennısshi AQSh-taǵy jarystyń jartylaı fınalyna ótti
NUR-SULTAN. QazAqparat – Qazaqstandyq Denıs Evseev Kanzas shtatyndaǵy Ýıchıto qalasynda (AQSh) ótip jatqan ITF týrnıriniń jartylaı fınalyna ótti, dep habarlaıdy QazAqparat tilshisi.
Jarystyń birinshi raketkasy D.Evseev shırek fınalda otandasy Beıbit Jýkaevpen synǵa tústi.
Birinshi partııada taı-breıkte 21 jastaǵy B.Jýkaev ábjildik tanytty – 7:6 (7:1).
Ekinshisinde D.Evseev ese qaıyrdy – 6:3.
Úshinshi, sheshýshi partııada Denıs tájirıbesi men sheberliginiń basym ekendigin baıqatty – 6:2.
Qazaqstandyq qos tennısshi arasynda tartysty ótken match 2 saǵat 24 mınýtqa sozyldy.
D.Evseev fınalǵa shyǵý úshin frantsııalyq Kleman Shıdehpen talasady.
Sonymen qatar Denıs pen Beıbit juptyq synda jartylaı fınalda óner kórsetedi.
Eske sala keteıik, budan buryn qazaqstandyq tennısshilerdiń AQSh-taǵy jarystyń jartylaı fınalyna shyqqanyn jazǵan bolatynbyz.
Sondaı-aq qazaqstandyq 5 jas tennısshi Eýropadaǵy týrnırlerdiń fınalyna shyǵyp , Anna Danılına Ispanııadaǵy jarystyń jeńimpazy atandy.
