Qazaqstandyq teńiz jaıaý áskerleri «Kaspıı teńizi-2015» baıqaýynyń shymyldyǵyn ashady (FOTO)
Bizdiń teńiz jaıaý áskerlerimiz «Kaspıı qunan jarysy» ataýymen birinshi kezeńde óner kórsetedi, dodanyń shymyldyǵyn ashyp, baıqaýdyń jalpy deńgeıin beredi. Qazir olar Kaspıısk qalasynyń «Skorpıon» polıgonynda daıyndalýda. Teńiz jaıaý áskerleri baǵdar syzbanusqalaryn egjeı-tegjeıli zerdelep, BTR-80 brondy transporterlerinde qashyqtyqty eńserýdi baıqap kórdi. Baıqaý aýqymynda olarǵa berilgen baǵdardy barynsha jyldam ótip, sondaı-aq teńiz ben jaǵalaýda nysanalardy joıýlary qajet.
«Kaspıı teńizi-2015» birinshi halyqaralyq baıqaýynyń bastalýyna bir-aq kún qalǵanyn aıta keteıik.
Teńiz bıatlony tamyzdyń 1-i men 15-i aralyǵynda ótedi. Saıys úsh kezeńnen turady. Birinshisi - teńiz jaıaý áskerleri bólimsheleriniń jarysy. Ekinshisi - «Kaspıı kýbogy». Oǵan Kaspıı mańy elderi Áskerı-teńiz kúshteri sýústi korablderiniń ekıpajdary qatysady. Olar berilgen baǵdar boıynsha sheńberdi aınalady, shaǵyn kólemdi teńiz jáne áýe nysanalaryn, júzbeli mınalardy joıý boıynsha jaýyngerlik jattyǵýlardy oryndaıdy. Sodan keıin korabldi zákir turaǵyna kóshirýdi, zákirge qoıýdy, bezendirý jalaýlaryn qoldana otyryp, belgilerdi qabyldaý-tapsyrýdy júzege asyrady. Keıinnen ekıpajdarǵa «apatqa ushyraǵan» korabldiń koordınattary beriletin bolady. Qatysýshylar oqıǵa ornyna kelýi, qutqarýdy júrgizýi jáne bortqa jolaýshylardy kóterýi qajet.
Úshinshi kezeń - «Sporttyq». Áskerı qyzmetshilerdiń dene daıarlyǵynyń deńgeıin aıqyndaýǵa baǵyttalǵan. Teńiz jaıaý áskerleri bólimsheleri men sýústi korablderi ekıpajdarynyń jeke quramyna 100 metrge erkin stılde júzý, gir sportynda jarysý, bólimshe quramynda 5 shaqyrymǵa júgirý, arqan tartý sııaqty normatıvterdi tapsyrý qajet.
Jarysta «Saryarqa» jáne «Oral» eki zymyran-artıllerııalyq korablderdiń ekıpajdary, sondaı-aq «Batys» ÓńQ teńiz jaıaý áskerleri brıgadasynyń 20 áskerı qyzmetshisi elimizdiń namysyn qorǵaıdy.