Qazaqstandyq teńge álemdegi barynsha qorǵalǵan valıýtalardyń biri bolyp tabylady - Q. Kelimbetov
QR Ulttyq bank tóraǵasy Qaırat Kelimbetovtiń aıtýynsha, teńgeni engizý QR Prezıdenti Nursultan Nazarbaevtyń «Ulttyq valıýtany engizý týraly» 1993 jylǵy 12 qarashadaǵy Jarlyǵyna sáıkes bastaldy. 15-qarashadan bastap teńge jańa tólem quraly jáne eldegi esep aıyrysý birligi retinde aınala bastady. Teńgeniń engizilýi - táýelsiz Qazaqstannyń damý tarıhyndaǵy eń aıqyn paraqtardyń biri jáne qazirgi kezde onyń tarıhı mándiligin elimizdiń qazirgisi men bolashaǵy úshin baǵalaı alamyz. Búgingi kúni biz ulttyq valıýtany engizý memlekettiligimizdi qalyptastyrý, egemendigimizdi nyǵaıtý jáne ekonomıkalyq damýdyń ozyq ulttyq úlgisin qurý jolynda qajetti qadam boldy dep senimdi túrde aıta alamyz.
«Óz ulttyq valıýtamyzsyz táýelsiz ekonomıkalyq saıasatty júrgizý ǵana emes, sonymen qatar eldiń óz damý jolyn aıqyndaýy, shynaıy egemendikti qamtamasyz etý, sondaı-aq ulttyq jáne ekonomıkalyq múddeni qorǵaý da múmkin emes. Bizdiń ulttyq valıýtamyz engizilgennen bastap az ǵana kezeńde birneshe ret kúrdeli synaqtarǵa ushyrady. Osyǵan qaramastan bizdiń ekonomıkalyq modelimiz árdaıym óziniń ómirsheńdigin dáleldedi. Tipti ótkir daǵdarystar kezinde bizdiń ekonomıkamyzdyń ornyqtylyq qorlary men saýatty makroekonomıkalyq saıasat ósýdiń teris qarqyndaryna jol bermedi», - dedi Q.Kelimbetov. Bas bankırdiń sózine qaraǵanda, qazaqstandyq teńge álemdegi barynsha qorǵalǵan valıýtalardyń biri bolyp tabylady. Ulttyq bank banknottardyń dızaınyn jetildirý, jańa tehnologııalardy paıdalaný, qorǵanysh elementterin kúsheıtý, jetekshi shet elderimen tájirıbe almasý boıynsha turaqty túrde jumys júrgizedi. Bul baǵyttaǵy jumys óz jemisin berýde. Qazaqstandyq banknottardyń halyqaralyq qaýymdastyq tarapynan baǵalanyp, joǵary marapattarǵa ıe bolýy sonyń naqty aıǵaǵy bola alady.
