Qazaqstandyq temir jol relsteri Reseıge jol tartty
Rels-arqalyq ónimderdiń qazaqstandyq óndirýshisi «Aqtóbe rels-arqalyq zaýyty» JShS (ARBZ) jasasqan sharttyń sheńberinde aǵymdaǵy jyldyń sońyna deıin «Reseı temir joldary» AAQ (RTJ) qajettilikteri úshin 50 000 tonna relsti jetkizý jumystaryn uıymdastyrady.
Shartqa sáıkes ARBZ Reseı Federatsııasynyń temir joldaryn jóndeý jumystarynda paıdalanýǵa arnalǵan uzyndyǵy 100 jáne 25 metr DT350 sanatyndaǵy R65 tıpti temir jol relsterin eksporttaıdy. Búgin 900 tonna kólemindegi relstiń alǵashqy partııasy Reseı Federatsııasyna jóneltildi.
«Reseı temir joldary» AAQ – jalpy uzyndyǵy 85,6 myń shaqyrymdy quraıtyn temir joldary bar álemdegi eń iri úsh temirjol kompanııasynyń biri.
ARBZ qurylysy 2013 jyldyń sáýir aıynda bastaldy. Jobanyń jalpy quny 82,7 mlrd teńgeni qurap, qajetti qarjylandyrýdyń 70% deıingi kólemi «Qazaqstannyń Damý Banki» AQ («Báıterek» holdınginiń enshiles kompanııasy, budan ári – QDB) tarapynan Qazaqstan Respýblıkasyn údemeli ındýstrııalyq-ınnovatsııalyq damytý jónindegi 2010-2014 jyldarǵa arnalǵan memlekettik baǵdarlama sheńberinde jobany 10 jyldan 20 jylǵa deıingi merzimge qarjylandyrýmen usynyldy. Sondaı-aq QDB jobany qurylystyń barlyq kezeńderinde: jobalaýdan bastap iske qosý sátine deıin súıemeldedi. QDB Siemens S.p.A-dan zamanaýı eýropalyq jabdyqty satyp alýǵa 47,7 mln eýro somasyna qaryz, sondaı-aq Jobany júzege asyrýǵa 66,8 mlrd teńge somasyna qaryz berdi. Birlesip qarjylandyrýshy bank retinde «Reseı Jınaq banki» AQ EB-da qatysqan.
Qazirgi ýaqytta «ARBZ» JShS – EAEO-daǵy jobalyq qýaty 200 myń tonna relsti jáne 230 myń tonna prokatty quraıtyn uzyndyǵy 120 metrge deıin jetetin termobeıimdelgen uzyn ólshemdi relsterdiń jetekshi óndirýshileriniń biri. Aýmaǵy 78,9 ga bolatyn zaýytta 800-den astam jumysshy eńbek etedi. Zaýyt jalpy temir jol qurylysy úshin de, joǵary jyldamdyqty magıstraldar úshin de relster shyǵarady. Onyń ónimderi Qazaqstan, Ýkraına, Reseı jáne Eýropanyń ulttyq standarttary boıynsha sertıfıkattalǵan.
2016 jyldan bastap qazaqstandyq temir joldardy salý jáne jóndeý barysynda 400 myń tonnadan astam ARBZ ónimi paıdalanylǵan, bul shamamen 3 myń shaqyrymdy quraıdy. Zaýyttyń relsteri Reseı, Ýkraına, Estonııa, Latvııa, Belarýs, Ózbekstan, Qyrǵyzstan, Grýzııa, Túrikmenstan, Aýǵanstan jáne Túrkııa elderinde qoldanylady.
Reseı temir joldary úshin relsterdiń prokaty Aqtóbe rels-arqalyq zaýytynyń strategııalyq seriktesi bolyp tabylatyn RF-tyń iri taý-ken metallýrgııalyq holdınginiń biri – «Metalloınvest» quramyna kiretin «Oskol elektr metallýrgııalyq kombınaty» AQ-tyń óndiris daıyndamalarynan júzege asyryldy.
«Sońǵy jyldary qazaqstandyq mashına jasaý salasynyń damý qarqyny turaqty ósip keledi jáne Aqtóbe rels–arqalyq zaýyty ol salaǵa aıtarlyqtaı úles qosýda. Aqtóbe rels–arqalyq zaýyty, Qazaqstan Damý Bankiniń, greenfield jobasy bolyp tabylady.
Búgin bul joba damýdyń senimdi vektoryn kórsetip, óndiretin ónimin tek Qazaqstan naryǵyna jetkizip qana qoımaı, sonymen qatar TMD elderine eksporttaýda» - dedi QDB Klıenttermen jumys isteý jónindegi dırektsııasynyń aǵa bankıri Qasym Muhanbetov.
Búgingi kúni Aqtóbe rels-arqalyq zaýyty eýropalyq naryqqa temir jol relsteriniń ekporty boıynsha jumys júrgizip jatqanyn jáne osy maqsatta ótken jyldyń qarasha aıynda TÜV Rheinland-tyń EN 13674-1:2017 standarty boıynsha eýropalyq úlgidegi 60E1 temir jol relsterin óndirýge sertıfıkatyn alǵanyn atap ótken jón. Relsterdiń bul túri Eýropalyq Odaq, Baltyq jaǵalaýy elderinde, sondaı-aq Taıaý Shyǵys pen Soltústik Afrıkada qoldanylady. Atalǵan sertıfıkat qazaqstandyq rels-arqalyq ónimderdi ótkizý geografııasyn keńeıtýge múmkindik beredi. Qazaqstan úshin ádettegi R65 relsterinen 60E1 relsteri tehnıkalyq parametrleri: relstiń bıiktigi, moıynynyń bıiktigi men qalyńdyǵy, bastıeginiń eni boıynsha erekshelenedi.
Sonymen qatar Aqtóbe rels-arqalyq zaýyty DSTÝ 4344:2004 boıynsha shyǵarylǵan 1 sanatty R65 tıpti temir jol relsteriniń óndirisin ıgerdi. Osy jumystardyń nátıjesinde naýryz aıynda sáıkestik sertıfıkaty alyndy, atalǵan sertıfıkattyń bolýy Ýkraına aýmaǵynda rels ónimderin satýdyń qajetti talaby bolyp tabylady.
Atalǵan is-sharalar kásiporynnyń da, Qazaqstan Respýblıkasynyń da eksporttyq áleýetin arttyrýǵa baǵyttalǵan. «Aqtóbe rels-arqalyq zaýyty» JShS jańa ónimniń kommertsııalyq óndirisine daıyn.
