Qazaqstandyq «temir analar» La-Mansh buǵazynda 36 shaqyrym júzip ótti
ALMATY. QazAqparat - 2019 jyldyń 2 shildesinde qazaqstandyq tórt trıatlonshy - «IronMoms KZ» («Temir analar») komandasy ýltra-trıatlonnyń «EnduromanArchtoArc» ekstremaldy túrinen jarysty bastady, dep habarlaıdy QazAqparat tilshisi.
Bul dıstantsııany «álemdegi eń sumdyq» dıstantsııa dep ataıdy. Sportshylar Londondaǵy Mármár qaqpasynan bastalyp, Parıjdegi Trıýmf arkasynda aıaqtalatyn 480 kılometrge jýyq dıstantsııany eńseredi. Etapqa qatysýshylar Londonnan Dývrǵa deıingi 140 shaqyrymdy júgirip ótip, sosyn La-Mansh buǵazyn 36 shaqyrym qashyqtyqty júzip ótip, ári qaraı Parıjge velosıpedpen 290 shaqyrymdy artta qaldyrady.
Dál sol La-Manshta (Aǵylshyn kanaly) sońǵy úsh jylda eki sportshy qaıtys bolǵany belgili. 2014 jyly dıstantsııany 80 saǵat 50 mınýtta kesip ótken 45-jastaǵy brıtandyq Nık Tomas 2016 jyldyń jazynda óz jetistigin qaıtalamaq bolady. Alaıda márege jaqyn qalǵanda esinen tanyp, aýrýhanada qaıtys boldy. Bir jyldan soń oqıǵa qaıtalanyp, 44-jastaǵy aǵylshyn trıatlonshysy Dýglas Ýeımark qaıtys boldy. ArchtoArc-ty tarıhta birinshi ret brıtandyq Edgar Ette 81 saǵat 5 mınýtta aıaqtaǵan bolatyn. Qazir Edgar - EnduromanArchtoArc dırektory jáne uıymdastyrýshysy.
«ArchtoArc»-ke tirkelý úshin sportshylar júgirýden, júzýden jáne velosıped tebýden tájirıbesi bolý kerek. Sonymen qatar, ony qujatpen dáleldeýi kerek. Sondaı-aq, olar 16°S-ten tómen temperatýrada júzýden alty saǵattyq test tapsyrýlary qajet.
«Mundaı shekteýlerge qaramastan, EnduromanArchtoArc trıatlonyna degen suranys joǵary jáne qatysýshylar keıde óz kezekterin bir nemese eki jyl kútedi. Jarys erejesi óte qatań - referı trıatlonshylardy jol boıy baqylaıdy», - dedi Elena Kýn Almaty trıatlon federatsııasynyń baspasóz hatshysyna telefon arqyly habarlasyp.
Trıatlonnyń bastalýy La-Mansh buǵazyndaǵy aýa-raıyna baılanysty bolǵandyqtan sportshylar sońǵy ýaqytqa deıin starttyń qashan bastalatynyn bilgen joq. Trıatlon uıymdastyrýshylary marshrýt bastalǵanǵa 20 saǵat qalǵanda habarlady.
2 shildede «Temir analar» - Elfıra Dýdnık, Elena Kýn, Madına Qurmanbaeva men Anel Sytdyqova Dývrge aman esen jetti.
«Biz júgirýdi aıaqtadyq! Endi bizge kúsh-jiger men sabyr kerek. EnglishChannel, bizge ádettegiden sál jumsaǵyraq bol!» - dedi qazaqstandyq sportshylar.
3 shildede qazaqstandyq trıatlonshylar La-Manshty júzip ótti. «Bul meniń ómirimdegi eń umytylmas tún boldy! We did it!», - dedi Elena Kýn.
Qazir qyzdar EnduromanArchtoArc sońǵy kezeńine - Frantsııadaǵy veloetapqa keldi.
«Bizdi Evropada turyp jatqan otandastarymyzben qatar, júzdegen frantsýzdar men aǵylshyndardyń qoldap jatqanyna qýanyshtymyz. Bul qazir trıatlonnyń álemdegi eń tanymal sport túrlerine jatatyn kórsetedi!» - dedi Elena Kýn.
