Qazaqstandyq teleekranǵa biregeı Moınaq GES-i jaıly túsirilgen otbasylyq kınolenta efırge shyǵady
ASTANA. QazAqparat - "Qazaqstan" respýblıkalyq teleradıokorporatsııasynyń tapsyrysy boıynsha "Astanatelefılm" kınostýdııasy "Jaryq" hıkaıasynyń túsirilimin aıaqtady. Premera "Qazaqstan" telearnasynyń efırinde 31 tamyzda kórsetiletin bolady. Bul týraly "Qazaqstan" respýblıkalyq teleradıokorporatsııasynyń baspasóz qyzmeti habarlaıdy.
"Jaryq" - kórermenderdi kóptegen emotsııalar kútetin kóńildi otbasylyq saga. Qyzyq sıýjetti hıkaıa keıipkerleri bir-birine ǵashyq bolyp, aıaq asty ajyrasady, jaqyndaryn taýyp, endi birde izdeý salyp jatady, birge ár túrli tosqaýyldardan qashyp jatady. "Jaryq" oqıǵalary "joǵary kerneý aımaǵynda" - biregeı Moınaq GES-i aınalasynda órbıtin bolady.
"Siz gıdroelektrostansada bolyp kórdińiz be? Mine kúsh qaıda jatyr! Mine minez qaıda!, - túsirilimniń protsesin rejısser Baqtııar Seıitqazıev osylaı sıpattaıdy. - Hıkaıa sıýjetine arnalǵan taǵy bir keremet syılyq - Moınaq GES-i ornalasqan jer: Sharyn ózeni jáne Sharyn shatqaldary Qazaqstan marjandary bolyp tabylady ǵoı. Bul jerlerge 12 mıllıonǵa jýyq jyl boldy emes pe! Biz osy jerlerde jasaǵan sulý da tabıǵı túsirilimder meni sýretshi retinde qatty tamsandyrǵany ras".
Drama jáne melodrama janrynda kıno túsiretin Qyrǵyzstannyń rejısseri Baqtııar Seıitqazıev - ónerdegi jolyn endi bastap kele jatqan jas maman emes. Onyń Qazaqstan kórermenderiniń sheksiz qyzyǵýshylyǵyn týdyrǵan birneshe hıkaıalar, qysqametrajdy lentalar túsirgen. "Jaryq" kórkem telehıkaıasynyń ázirleýshileri osy hıkaıa da "Qazaqstan" telearnasynyń kórermenderiniń kóńilinen shyǵatynyna senimdi.
"Jaryq" telehıkaıasy "Qazaqstan" telearnasynyń efırinde 31 tamyzda bastalady. Kórermenderdi tolǵandyratyn áreketterden turatyn 24 epızod kútip turǵanyn esterińizge salamyz. Sonymen birge, "Qazaqstan" RTRK aldaǵy maýsymda aýdıtorııany tańǵaldyrýǵa jáne tańdandyratyn taǵy da kóptegen hıkaıalar men ǵajap jobalardy ázirleý ústinde.
