Qazaqstandyq telearnalardyń baǵdarlamalyq kontentiniń 70 paıyzy sheteldik ónimder - 31 telearnanyń bas dırektory

ALMATY. 20 qarasha. QazAqparat - Televıdenıede otandyq ónimniń damýy úshin jaǵdaı jasaý kerek. Bul týraly búgin Almatyda «Qazaqstannyń medıa naryǵy: ońtaıly basqarý jáne damytatyn tustary» degen taqyryppen ótip jatqan 5-shi medıa quryltaıda sóz boldy.

«Qazaqstandyq telearnalardyń baǵdarlamalyq kontentiniń 70 paıyzy sheteldik ónimder. Otandyq ónimdi ulǵaıtý úshin birneshe telearna birlesip usynys jasap otyrmyz. Jeke telearnalardy jáne prodıýserlik kompanııalardy qosymsha qun salyǵynan, sondaı-aq olar memlekettik tilde ónim shyǵarsa, 50 paıyzǵa salyqtan bosatsa dep usynys jasap otyrmyz», - deıdi 31 telearnanyń bas dırektory Baǵdat Qojahmetov. Onyń aıtýynsha, otandyq ónimdi damytýda shet elderdiń tájirıbesin eskergen jón. Máselen Ýkraınada 3 jylǵa deıin zańdy túrde reseılik telearnalardy taratýǵa tyıym salynǵan. Sonyń nátıjesinde jańadan on shaqty telearnalar qalyptasty. Al 2 jyldan keıin jergilikti telearnalarda Reseıdiń ORT  sııaqty magnattarymen básekege túsý múmkinshiligi paıda boldy. Onda sonymen qatar kıno aınalymynyń 5 paıyzy arnaıy qorǵa jınaqtalyp, avtorlyq kınonyń damýyna bólinýde.