Qazaqstandyq taýarlar jaqynda Túrkııadaǵy eń aýqymdy marketpleıske shyǵarylady

ASTANA. QazAqparat - Jaqyn arada qazaqstandyq taýarlar Túrkııanyń eń aýqymdy marketpleısine shyǵýy múmkin. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın óziniń Telegramdaǵy arnasynda jazdy.

«Osy jyldyń mamyr aıynda Prezıdentimiz Qasym-Jomart Kemeluly Túrkııa Respýblıkasyna memlekettik saparmen barǵan ýaqytta, osy eldiń birqatar kompanııalarymen kelissózder júrgizip, otandyq IT-kompanııalardy tanystyrǵan bolatynmyn.

Solardyń biri, baýyrlas eldiń naryǵynda onlaın saýda boıynsha kóshbasshy kompanııa- Trendyol bolatyn. Trendyol – Túrkııa aýmaǵynda ınternet dúken arqyly, ıaǵnı ózderiniń elektrondy platformasy arqyly taýar jetkizýmen jáne satýmen analysady (kúnine shamamen 1,5 mılıon taýar satady)» dep jazdy Baǵdat Mýsın.

Trendyol-dy Túrkııada jergilikti Amazon nemese Alibaba dep ataıdy. Kompanııanyń quny shamamen 16 mıllıard dollar qarjyny quraıdy.
Mınıstrdiń aıtýynsha, aldaǵy ýaqytta qazaqstandyq taýarlar osy júıe arqyly Túrkııanyń naryǵyna shyqpaq.

«Sapar barysynda biz olardyń taýarlaryn Qazaqstanǵa jetkizý boıynsha logıstıkalyq máselelerdi pysyqtadyq, sondaı-aq qazaqstandyq taýarlardy iri marketpleıs arqyly Túrkııa naryǵyna shyǵaramyz dep kelistik, - deıdi mınıstr. — Endi mine bul bastama – Túrkııa Respýblıkasynyń Prezıdenti Rejep Erdoǵannyń Qazaqstanǵa sapary aıasynda óz nátıjesin kórsetti. Búgin aımaqtyq marketpleısterge qyzmet kórsetetin qazaqstandyq logıstıkalyq kompanııalardyń biri -Big Way KZ Túrkııalyq Trendyol kompanııasymen yntymaqtastyq týraly kelisimge qol qoıdy. Big Way KZ otandyq naryqta logıstıkalyq taýar aınalymyn júzege asyrýmen aınalysyp kele jatqan kompanııa. Olardyń sheteldik naryqqa shyǵýyna áleýetteri aıtarlyqtaı zor. Birlesken kelisimniń arqasynda endi Qazaqstandyq taýarlar Túrkııa naryǵyna tikeleı, deldalsyz satylatyn bolady».
Vedomstvo basshysy qazaqstandyqtar Trendyol-men tanys ekenin jáne kóbinese deldaldar arqyly taýarlarǵa tapsyrys beretinin atap ótti.