Qazaqstandyq taýar óndirýshiler úshin bırja saýdasyndaǵy akkredıtteý júıesi jeńildeıdi
Memleket basshysynyń tapsyrmasyna sáıkes QR Saýda jáne ıntegratsııa mınıstrligi qoldanystaǵy «Keıbir zańnamalyq aktilerge saýda qyzmeti, bırjalyq saýdany damytý jáne derbes derekterdi qorǵaý týraly zań jobasyna ózgerister men tolyqtyrýlar engizdi.
«Prezıdent júktep otyrǵan tapsyrmaǵa saı bırja saýdasynyń biryńǵaı qaǵıdasyn iske asyrýdyń jańa tásilderi qolǵa alynady. Birinshiden, brokerler men dılerlerdiń taýar bırjasyna qol jetkizýine biryńǵaı talap engiziledi. Olarǵa eki jáne odan da kóp bırjany akkredıtteýge múmkindik beriledi. Ekinshiden, satýshylar men satyp alýshylardyń saýda sharttary men rásimderin ózgertpeı basqa bırjaǵa erkin ótý múmkindigi engizilmek. Úshinshiden, otandyq taýar óndirýshiler úshin bırja saýdasyndaǵy akkredıtteý júıesi jeńildeı túspek. Ol úshin bırjalyq alymnyń tómendetilgen stavkasy belgilenedi. Jáne tórtinshiden bırjalyq mámilelerdiń jaýapkershiligi men qaýipsizdigi deńgeıin arttyrý qarastyrylyp otyr. ıAǵnı bırja qatysýshylarynyń táýekelin tómendetý úshin eń tómengi qarjylyq turaqtylyqtyń shegin belgileý kózdelgen», - dep habarlandy atalǵan vedomstvodan.
Sondaı-aq, zańdaǵy ózgerister men tolyqtyrýlar aıasynda otandyq bırja saýdasyn ne kútip turǵany týraly aıtyldy.
«Bırjalyq saýdanyń turaqty naryǵyn qalyptastyrýǵa, qoljetimdilik pen adal básekelestikti arttyrýǵa jaǵdaı jasaıdy. Satýshylar men satyp alýshylar tarapynan brokerler men bırjaǵa qatysty yqtımal áser men qysym joıylady. Sonymen qatar zańdaǵy ózgeris jańa bırja taýaryn jetkizýshiler men satyp alýshylardy, sonyń ishinde sheteldik satyp alýshylardy yntalandyra túspek. Jáne otandyq bırja saýdasy kóleminiń 5,6 trln teńgege deıin artatyny kútilýde. Odan bólek, tabıǵı baǵany belgileýge jáne bırjalyq kelisimderdiń ashyqtyǵyn qamtamasyz etýge múmkindik beredi», - delingen habarlamada.
