Qazaqstandyq taýar óndirýshiler sertıfıkatsyz taýarlaryn sata almaıdy
Astana qalasynyń resmı saıtynyń habarlaýynsha, bul týraly búgin elorda ákimdiginde ótken keńeste Aýyl sharýashylyǵy basqarmasynyń bastyǵy Murat Dalabaev málim etken.
«Memlekettik satyp alý týraly» zańnamanyń, 44-baby 5-tarmaǵynda «Memlekettik satyp alýdy uıymdastyrýshylar Qazaqstan Respýblıkasynyń Úkimeti bekitken tizbede kórsetilgen azyq-túlik taýarlaryn memlekettik satyp alýdy júrgizý kezinde osy Zańda kózdelgen tásildermen otandyq taýar óndirýshilerden ǵana memlekettik satyp alýdy júzege asyrady».
Qazaqstan Respýblıkasy Úkimetiniń 2009 jylǵy 22 qazandaǵy №1647 Qaýlysymen engizilgen, azyq-túlik taýarlarynyń shyǵarylǵan jerin rastaıtyn QR ST sertıfıkaty, Úkimettiń 2012 jylǵy 21 tamyzdaǵy №649 Qaýlysymen jańartyldy. Tizbede azyq-túlik taýarlarynyń 101 túri, ıaǵnı azyq-túlik taýarlarynyń barlyq túri kórsetilgen. Sertıfıkat tek taýar shyǵarýshyǵa beriledi, alyp-satarlar men aradaǵy deldaldarǵa berilmeıdi, dedi Basqarma bastyǵy.
Keńeste sóz alǵan Astana qalasy Saýda-ónerkásip palatasy tóraǵasynyń orynbasary Elena Batrak, «sertıfıkatty berý eki kezeńnen turady. Saraptama uıymy saraptama aktisin alady, onda Qaýlyǵa sáıkes baǵalaý júrgiziledi. Eger taýar shyǵarýshy josparly rejımde, ıaǵnı jyl boıy turaqty túrde jumys istese, onda oǵan biregeı sertıfıkat beriledi. Sertıfıkatta kásiporynnyń bir jylda shamamen óndiretin taýarynyń kólemi kórsetiledi. Sertıfıkattyń quny 4 AEK, ıaǵnı 6924 teńge turady.
Taǵy bir aıta keter jaıt, otandyq taýar óndirýshiler qataryna, shıkizatty Qazaqstannan alyp taýar óndiretin kásiporyndardy jatqyzamyz. Al, ónimin shetelderden ákelip, ony Qazaqstanda orasa, ol otandyq ónim bolyp sanalmaıdy.
Prezıdent Ákimshiliginiń, Premer-Mınıstrdiń hattamalyq tapsyrmalaryna sáıkes, qarjylyq baqylaý organdaryna memlekettik satyp alýdy uıymdastyrý kezinde osy tarmaqqa muqııat kóńil bólý jáne ony oryndaý tapsyrylǵan. Aldaǵy ýaqytta qarjylyq baqylaý organdary jáne bizdiń basqarma tapsyrmanyń oryndalýyn óz baqylaýyna alady», - dedi.
