Qazaqstandyq tasymaldaýshylardyń básekege qabiletin arttyratyn qujat maquldandy

NUR-SULTAN. QazAqparat – Parlament Májilisiniń jalpy otyrysynda «2007 jylǵy 6 naýryzdaǵy Qazaqstan Úkimeti men Grýzııa Úkimeti arasyndaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat.

«Atalǵan Hattama ekijaqty jáne tranzıttik, sondaı-aq úshinshi elge/elderden avtokólikpen júk tasymaldaýǵa ruqsat berý júıesin engizýdi kózdeıdi. Qazirgi ýaqytta eki el arasynda avtokólikpen júk tasymaldaý «ruqsatsyz» negizde júzege asyrylady.

Ruqsatsyz júıe Grýzııa kólik operatorlaryna avtomobıl tasymalyn oryndaý kezinde basym bolýǵa múmkindik beredi. Eger 2018 jyly eksport-ımport tasymalynyń 53 paıyzyn Grýzııa kólik operatorlary oryndasa, 2019 jyly bul kórsetkish 69 paıyzdy qurady», - dedi QR Indýstrııa jáne ınfraqurylymdyq damý mınıstri Beıbit Atamqulov.

Onyń basty sebepteri mynada:

- Grýzııada halyqaralyq tasymaldaǵy avtokólik parki keńeıdi. Elimizde ol 7 myń 754 bolsa, Grýzııada 8 myń 901-ge jetti;

- sońǵy kezderi Grýzııa aýmaǵynda Grýzııa-Túrkııa, Grýzııa-Ýkraına sııaqty birlesken avtotasymal kásiporyndary ashyldy;

- Grýzııanyń teńizge shyǵýǵa múmkindigi bar.

«Sondyqtan ruqsat berý júıesin engizý: birinshiden, kólikpen halyqaralyq avtotasymal naryǵyndaǵy tepe-teńdikti ornatýǵa múmkindik beredi. Ekinshiden, otandyq kólik operatorlarynyń tasymaldaǵy úlesin arttyrýǵa yqpal etedi. Úshinshiden, qazaqstandyq tasymaldaýshylardyń básekege qabiletin arttyryp, tabystarynyń ósýi esebinen elimizdegi kólik parkiniń ulǵaıýyna jaǵdaı jasaıdy», - dedi mınıstr.

.