Qazaqstandyq tasymaldaýshylar sheteldik memleketterdiń aýmaǵy arqyly júrýge ruqsatty egov.kz portalynan alý múmkindigi bar
ASTANA. 4 shilde. QazAqparat - Qazaqstan Respýblıkasyndaǵy halyqaralyq avtomobıl tasymaldary kezinde ruqsat berý júıesin qoldaný erejesine engiziletin ózgerister men tolyqtyrýlardy kózdeıtin QR Úkimetiniń qaýlysy 2013 jylǵy 5 shildede óz kúshine enedi.
«Tasymaldaýshylar ruqsat alýǵa ótinishti elektrondyq úkimettiń portaly arqyly bere alady. Budan ári júıe tasymaldaýshynyń atyna jazylǵan kólik quraldarynyń sanyn eseptep, oǵan qansha ruqsat qujatyn berý qajet ekenin avtomatty túrde anyqtaıdy. Al ınspektorlar qujatty toltyryp, ony HQKO jiberedi. Tasymaldaýshylar ruqsat qujattaryn HQKO-nan alady», - delingen QR KKM baspasóz qyzmetiniń málimetinde.
Atalǵan júıen avtomattandyrý, atap aıtqanda beriletin qujat sanyn esepteý formýlasyn qoldaný ruqsat qujatyn tıisti mólsherden artyq berý múmkindigin boldyrmaıdy.
Zańǵa engiziletin ózgertýler men tolyqtyrýlar Qazaqstandyq tasymaldaýshylardyń sheteldik memleketterdiń aýmaǵy arqyly júrip ótýine ruqsat qujatyn berý úderisin avtomattandyrýmen qatar, osy qujatty alýǵa berilgen ótinish ýaqytyn qaraý merzimin eki kúnge deıin qysqartady.
Qaýly óz kúshine engenge deıin ruqsat qujattaryn berý blankilerin bólýdiń avtomattandyrylǵan júıesi pılottyq tártipte iske qosylǵan bolatyn.
2013 jyldyń basynan beri atalǵan avtomattandyrylǵan júıe arqyly 24 myńnan astam sheteldik ruqsat qujattary berilgen bolatyn, onyń 13 myńy Qytaı memleketine barýǵa berilgen.
