Qazaqstandyq tanymal mýzykant Jah Khalib Kıevte ekenin aıtty
NUR-SULTAN. QazAqparat – Otandyq tanymal ánshi, reper Jah Khalib Ýkraına astanasy Kıev qalasynda ekenin málim etti, dep habarlaıdy QazAqparat tilshisi.
«Biz osyndamyz. Biz Kıevtemiz. Bir panadan ekinshi panaǵa tasalap júrmiz. Din amanbyz, sabyrlyq saqtaýdamyz. Eshqaıda barmaımyz. Ýkraınalyqtar, men sizderdi jaqsy kórip qana qoımaı, súısinemin», - dep jazdy Jah Khalib Instagram paraqshasynda.
Aıta keteıik, buǵan deıin Ýkraınadan evakýatsııalanǵan qazaqstandyq shekaradaǵy jaǵdaı týraly aıtyp bergen edi.
Ýkraınadaǵy Qazaqstan azamattarynyń jaǵdaıyna kelsek, elimizdiń syrtqy ister mınıstrligi 80 otandasymyzdyń Polshaǵa jetkizilgenin habarlady.
Sondaı-aq, Polshaǵa jetken qazaqstandyqtardyń alǵashqy legi elge búgin ushatyny aıtyldy.
Ýkraınadaǵy otandastarymyzdyń nazaryna taǵy bir aqparat, atalǵan eldegi Qazaqstan konsýldarynyń baılanys telefony men mekenjaıy jarııalandy.
