Qazaqstandyq tanymal ánshi tájik boksshysyn nokaýtqa jiberdi
ASTANA. QazAqparat - Ekinshi orta salmaqtaǵy qazaqstandyq boksshy ári ánshi Ibragım Eskendir qarsylasyn nokaýtqa jiberip, kórermenderdi tań-tamasha qaldyrdy, dep habarlaıdy SPORTINFORM .
Ibragım Eskendir sharshy alańǵa ulttyq shapanmen jáne ózi oryndaıtyn ánniń súıemeldeýimen shyqty. Qarsylasy ıyqty ári susty kóringenimen, qazaqstandyq ánshiniń jankúıerlerine arnaǵan «syıy» bar eken. Kezdesý bastalysymen Ibragım tolassyz shabýylǵa basyp, qarsylasyn yqtyryp tastady. Dóp tıgen birneshe soqqydan keıin Tájikstannan kelgen debıýtant sulq túsip, aıqasta jeńilis tapty. Ibragım birinshi raýndta tehnıkalyq nokaýtpen jeńis tuǵyrynan kórindi.
Qazaqstandyq ánshi ári boksshy kásibı bokstaǵy ekinshi kezdesýin sátti ótkizip otyr.
Eske sala keteıik, 9 jeltoqsan kúni Máskeýde ótken aıqasta Ibragım qyrǵyzstandyq Sherǵazy Saqtanovty merziminen buryn jeńgen bolatyn.
