Qazaqstandyq tankısterdiń ekinshi ekıpajy halyqaralyq armııa oıyndarda jeńiske jetti
Máskeý mańyndaǵy «Alabıno» polıgonynda «Tank bıatlony» baıqaýynyń ekinshi ekıpajdarynyń jarysynda qazaqstandyq tankıster taǵy da jeńiske jetti. Tank komandıri aǵa leıtenant Seıitjan Qobylanuly, kózdeýshi-operator serjant Baýyrjan Buǵybaev jáne mehanık-júrgizýshi efreıtor Jannur Jumabaevtardan turatyn ekıpaj kedergilerdi eńserip, atys tapsyrmalaryn sátti oryndap shyqty.
Qazaq jaýyngerleri trassadan 26 mınýt 35 sekýndta óte bildi. Ekinshi oryndaǵy Ózbekstan áskerı qyzmetshilerdiń nátıjesi – 27 mınýt 23 sekýnd.
Ázerbaıjanda sýústi kemeleri ekıpajdarynyń qatysýymen «Teńiz kýbogy» baıqaýynyń birinshi kezeńi ótti. Onda áskerı teńizshiler qalqymaly mınanyń maketin atý tapsyrmalaryn oryndady. 3-dárejeli kapıtan Raýan Ergebekov basqaratyn qazaqstandyq «Saryarqa» korabliniń quramynda raketalyq-artıllerııalyq jaýyngerlik bólim komandıri aǵa leıtenant Azamat Baqtyǵalıev pen bas starshına Erlan Toqtabaevtar bar ekıpaj tapsyrmany oıdaǵydaı oryndap shyqty. Kezeń qorytyndysy boıynsha birinshi oryndy 45 ball jınaǵan Ázerbaıjan men Reseıdiń áskerı teńizshileri ózara bólisti. Qazaqstan komandasy 42 upaımen ekinshi orynda tur.
Kabardıno-Balkarııada jasandy jartasty relefte «Elbrýs saqınasy» baıqaýynyń tórt arnaıy tapsyrmasyn oryndaǵan Qazaqstan komandasy besinshi orynnan úshinshi orynǵa kóterildi. Bul saıysta Reseıdiń áskerı alpınısteri kósh bastap tursa, ekinshi orynda Ózbekstannyń áskerı qyzmetshileri keledi.
Armenııada «Beıbitshilik jaýyngeri» áskerı-sporttyq saıysynyń birinshi kezeńi aıaqtaldy. Saıys barysynda áskerı qyzmetshiler dene shynyqtyrý daıarlyǵynan normatıvter tapsyrdy. Jarys nátıjeleri boıynsha birinshi orynda Belarýs, ekinshi orynda – Qazaqstan, úshinshi orynda – Reseı áskerı qyzmetshileri.
