Qazaqstandyq tankıster «Tank bıatlony» saıysyna daıyndyqty bastady

NUR-SULTAN. QazAqparat - Máskeý mańyndaǵy «Alabıno» polıgonynda qazaqstandyq komanda tank bıatlony jarysynda ózderi óner kórsetetin tehnıkany qabyldaýdy bastady, dep habarlaıdy QazAqparat.

QR Qorǵanys mınıstrliginiń málimetine súıensek, j erebe nátıjesinde Qazaqstan komandasy sary túske boıalǵan tórt tankige ıe bolǵan. Konkýrs uıymdastyrýshylary - reseılik taraptan usynylǵan tehnıkany tehnıkalyq qamtamasyz etý toby ofıtserleriniń basshylyǵymen epıpajdar qabyldady.

Qabyldaý barysynda tankilerdiń tehnıkalyq jaǵdaıy, jaýyngerlik mashınanyń bólikteri jáne mehanızmderiniń jaramdylyǵy men qabilettiligi tekserildi. Sonymen qatar tankterdiń tehnıkalyq qamtamasyz etilýi jáne paıdalaný aldyndaǵy daıyndyqqa nazar aýdaryldy.

Qazaqstandyq áskerı qyzmetshiler jaýyngerlik mashınalardyń jaǵdaıy qanaǵattanarlyq ekendigin jáne «Tank bıatlony» saıysy aıasyndaǵy barlyq tapsyrmalardy oryndaýǵa múmkindik beretinin atap ótti.

Jarys bastalmas buryn qazaqstandyq tankishilerge qarý-jaraqtyń daıyndyǵy men dáldigin durystap, tank bıatlony trassasynyń baǵytyn muqııat zerdeleý qajet.

Eske sala keteıik, Armııa halyqaralyq oıyndary-2020 aıasynda ótkiziletin «Tank bıatlony» halyqaralyq jarysy 23 tamyz - 5 qyrkúıek aralyǵynda «Alabıno» polıgonynda ótedi. Qazaqstandyq komanda alǵashqy jeke jarysyn 25 tamyz kúni bastap, Qyrǵyzstan, Reseı jáne Ózbekstan tankishilerimen birge bir topta óner kórsetedi.

Jalpy saıysqa 16 eldiń tank ekıpajdary qatysady.