Qazaqstandyq tankishiler 2 qyrkúıekte jartylaı fınaldyq estafetada óner kórsetedi

MÁSKEÝ. QazAqparat - Máskeý mańyndaǵy «Alabıno» polıgonynda Tank bıatlonynyń jeke jarysy aıaqtalyp, jartylaı fınalda baq synasatyn 8 qatysýshy anyqtaldy, dep habarlaıdy QazAqparat QR Qorǵanys mınıstrligine silteme jasap.

Komandalardyń barlyq úsh ekıpajynyń trassadan ótýiniń jalpy ýaqytyn esepke ala otyryp, jartylaı fınaldyq jarysta óner kórsetetin tankishiler quramy anyqtaldy. 1 qyrkúıekte Ázerbaıjan, Belarýs, Qytaı jáne Serbııanyń tankısteri synǵa túsedi. Al 2 qyrkúıekte fınalǵa shyǵý úshin Qazaqstan, Qyrǵyzstan, Reseı jáne Ózbekstan komandalary baq synasady.

Jartylaı fınalda elden úsh ekıpaj óner kórsetedi. Ár komanda barlyq qashyqtyqty bir tankte ótýi kerek. Al ekıpajdar estafetany eńsere otyryp, jaýyngerlik mashınada kezeń-kezeńmen bir-birin aýystyrady. Árbir ekıpaj úsh atys shepterimen jáne 10 kedergilermen jalpy uzyndyǵy 16 shaqyrymnan astam trassanyń 4 sheńberin eńserýi tıis.

Jartylaı fınaldyq estafetada qatysýshylar kórsetken qorytyndy boıynsha 5 qyrkúıekte Armııa halyqaralyq oıyndarynyń jabylýy kúni fınaldyq jarysta jeńiske jetý úshin kúresetin 4 úzdik komanda anyqtalady.