Qazaqstandyq tank ekıpajdarynyń álem chempıonatyna daıyndyǵy pysyqtaldy
«Tank bıatlony» halyqaralyq áskerı chempıonaty 2014 jyldan bastap ótkizilýde, Qazaqstan óz kezeginde atalǵan sharaǵa turaqty túrde qatysyp keledi.
Basty talap - arnaıy kedergilerden súrinbeı ótip, belgilengen qashyqtyqty jyldam meńgerý. Jarys áskerı tájirıbeni pysyqtaý men áskerı tehnıkany meńgerý mashyǵyn tekserýge arnalǵan. Tank bıatlony jeke jáne komanda bolyp jarysatyn eki kezeńnen turady.
Qazaqstandyq tank ekıpajdarynyń Aıagózdiń «Maılın» polıgonyndaǵy tank bıatlonyna daıyndyq barysyna toqtala kele, «Bıylǵy daıyndyqty erte bastadyq, aldaryńyzda Qazaqstan boıynsha úzdik dep tańdap alynǵan ekıpajdar óz daıyndyqtaryn kórsetýde. Qazir sarbazdar tankti meńgerý men kedergilerden ótý boıynsha joǵary nátıje kórsetýde, endigi maqsat - ýaqyt jyldamdyǵyn pysyqtaý. Bul sharada biz áskerı shyńdalýymyzdy kórsetip qana qoımaı, sonymen qatar úzdik tájirıbemizdi pash etemiz», - deıdi Astana óńirlik qolbasshysynyń jaýyngerlik daıarlyq jónindegi orynbasary, polkovnık ıÝrıı Asqarov.
Qazaqstandyq komandada 21 ásker, onyń 4-ýi - ekıpaj músheleri. Jattyǵý daıyndyǵy T-72A tankisimen arnaıy polıgonda júrýde.
«Tank bıatlony jarysyna 6 jyl qatarynan qatysyp kelemin, men úshin Qazaqstan qarýly kúshteriniń myqtylyǵyn álem elderi aldynda kórsetý úlken abyroı jáne jaýapty is. Tank bıatlonynda ekıpajdardyń eń joǵarǵy kórsetkishi - 19 mınýt, biz sol nátıjeni jańartýdy maqsat etip otyrmyz», -deıdi Aıagózdegi №10810 áskerı bólimi, 2 tank batalonynyń aǵa-mamany, júrgizýshi Dýman Baıjanov.
Bıylǵy tank bıatlony Máskeý mańyndaǵy Alabıno polıgonynda 28 shilde men 11 tamyz aralyǵynda ótedi, áskerı jarysqa qatysýǵa 24 memleket ótinish bildirgen. Qazaqstan ótken jylǵy halyqaralyq tank bıatlonynan 2-oryn ıelengen bolatyn. 
