Qazaqstandyq tamaq ónimderin óndirýshiler Qytaıdyń taǵy bir marketpleısine kirýge múmkindik aldy

ASTANA. QazAqparat - Almaty qalasynda QR Caýda jáne ıntegratsııa vıtse-mınıstri Qaırat Tórebaevtyń «Qytaı Sınsın korporatsııasy» JShS dırektorlar Keńesiniń Tóraǵasy Chjan Tszıan myrzamen kezdesýi ótti.

Taraptar qazaqstandyq ónimdi Qytaıdyń iri marketpleısterine, atap aıtqanda JD.com elektrondyq platformasyna shyǵarýdaǵy ózara is-qımyldy talqylady, dep habarlaıdy QazAqparat QR Saýda jáne ıntegratsııa mınıstrliginiń resmı saıtyna silteme jasap.

«JD.com» (Jingdong Mall)-1998 jyly qurylǵan Qytaıdaǵy taýarlar men qyzmetterdi satýǵa arnalǵan eń iri onlaın platforma. Elektrondyq alań álemdegi eń iri onlaın satýshylardyń biri bolyp sanalady, munda elektronıka, kıim, aıaq kıim, kosmetıka, azyq-túlik jáne t.b. taýarlardy alǵanda, 1 mıllıonnan astam taýar satylady.

Foto: gov.kz

Kelissózderge eksporttyq áleýeti joǵary tamaq ónimderin shyǵaratyn 10-ǵa jýyq qazaqstandyq kásiporyn qatysty. Bul kúnbaǵys, raps maıy, kondıterlik ónimder, alkogoldi jáne alkogolsiz sýsyndar, taǵamdar jáne t. b. óndirýshiler.

Qytaılyq seriktester usynylǵan azyq-túlik úlgilerimen tanysyp, qazaqstandyq taýarlardy Qytaı naryǵyna jetkizý boıynsha odan ári yntymaqtastyqqa qyzyǵýshylyq tanytty.

Sınsın kompanııasynyń qytaı naryǵyndaǵy álemdegi jetekshi kompanııalardy satý jáne qyzmet kórsetýdegi mol tájirıbesin paıdalaný arqyly kezdesýge qatysýshylar qazaqstandyq ónimdi JD.com platforma arqyly Qytaıǵa jyljytý múmkindikterin anyqtady.

Sondaı-aq, kelissóz barysynda «Sınsın Qytaı korporatsııasy» JShS basshysy kompanııanyń densaýlyq saqtaý salasyndaǵy yntymaqtastyqqa, onyń ishinde Qazaqstannyń medıtsınalyq mekemelerine medıtsınalyq jabdyqtar men preparattardy jetkizýge, medıtsınalyq kadrlardy oqytý tájirıbesimen almasýǵa múddeliligin atap ótti.