Qazaqstandyq taǵy úsh boksshy Serbııadaǵy týrnırde fınalǵa shyqty
NUR-SULTAN. QazAqparat - Bokstan áıelder arasyndaǵy halyqaralyq «Ulttar kýbogi» dodasynda taǵy úsh qazaqstandyq bylǵary qolǵap sheberi fınalǵa shyqty, dep habarlaıdy QazAqparat tilshisi.
Týrnırde 60 kelide synǵa túsip jatqan Rımma Volosenko túrkııalyq qarsylasynan aılasyn asyrdy. Al 81 kelide sharshy alańǵa shyqqan Lázzat Kúngeıbaevaǵa chehııalyq sportshy qarsy tura alǵan joq. Jerebe nátıjesimen Gúlsaıa Erjan 81 kelide birden aqtyq synǵa joldama aldy.
Qazaqstan quramasy sapynan Valentına Halzova túrkııalyq boksshyǵa jol berip qoıdy. Ol týrnırde osylaısha qola júldeni qanaǵat tutty.
Esterińizge sala ketelik, budan buryn Araılym Marat (48 keli), Dına Jolaman (54 keli) jáne Vladıslava Kýhta (57 keli) fınalǵa joldama alǵanyn habarlaǵan edik.
Halyqaralyq týrnırde qazaqstandyq toǵyz boksshy attanǵan bolatyn.
Atalmysh týrnırde buǵan deıin qazaqstandyq boksshylar 2012, 2015, 2016, 2018 jyldarda komandalyq esepte jeńimpaz atandy. Úsh márte mundaı mártebege reseılikter ıe boldy.
