Qazaqstandyq taekvondoshylar álem kýbogyna qatysady
QR UOK baspasóz qyzmeti habarlaǵandaı, atalǵan doda 25 shilde kúni Qytaıdyń Ýsı qalasynda ótedi. Onda Qazaqstan namysyn Aıtýar Shaıkenov, Nursultan Mamaev, Les Abdýsammat, Dúısebaı Smaıyl qorǵaıdy.
Komandalyq eseptegi álem kýbogy G8 sanatyndaǵy týrnırge jatady. Bul jarysqa qatysyp, jeńiske jetken sportshylar álemdik reıtıngtegi jaǵdaıyn da biraz jaqsarta túspek.
Qazaqstan taekvondo federatsııasynyń vıtse-prezıdenti Arman Shylmanovtyń aıtýynsha komandalyq eseptegi álem kýbogyna reıtıngtegi úzdik 16 komanda ǵana qatysa alady. Qazaqstan quramasy 10-shy orynda tur. Taekvondodan negizgi quram Djakartada ótetin Azııa oıyndaryna daıyndalý ústinde. Al Qytaıǵa bara jatqan sportshylar óz salmaqtarynyń úzdigi bolǵanymen olar synǵa túsetin salmaq dárejeleri Azıada oıyndarynyń baǵdarlamasyna enbegen.
Qazaqstan quramasy álem kýbogyna daıyndyq kezeńin Astanada ótkizdi. Búgin túnde olar Qytaıǵa ushyp ketedi.