Qazaqstandyq taekvondoshy WTF atqarýshy komıtetiniń quramyna endi
ASTANA. QazAqparat - Býtan elinde ótip jatqan Dúnıejúzilik taekvondo federatsııasynyń kezekten tys jınalysynda qazaqstandyq Arman Chılmanov osy federatsııanyń prezıdenti, doktor Chýng Vo Chonyń qolynan atalmysh uıymnyń atqarýshy komıtetiniń múshesi sertıfıkatyn aldy, dep habarlaıdy Qazaqstan taekvondo federatsııasynyń baspasóz qyzmetinen.
Endi A.Chılmanov WTF-tyń barlyq sheshimderinde daýys berý quqyǵyna ıe. Ol Dúnıejúzilik federatsııanyń barlyq jınastary men saılaýlaryna qatysady. Al osy jıynda taekvondo erejelerin ózgertip, naq osy sport túrin keńinen nasıhattaý máseleleri talqylandy. Arman Chılmanov taekvondodan Olımpıada oıyndarynyń júldesine qol jetkizgen jalǵyz qazaqstandyq, ol qazir Qazaqstan taekvondo federatsııasynyń sport dırektory men memlekettik jattyqtyrýshy qyzmetinde. Atap óterligi, A.Chılmanov WTF-tyń atqarýshy komıtetine múshelikke alynǵan alǵashqy qazaqstandyq. Buǵan deıin qazaqstandyqtar tek Azııalyq Odaq quramynda ǵana boldy. Arman bul komıtetke eki jyl merzimge - 2016 jyly Rıo-de-Janeıroda ótetin Olımpıada oıyndaryna deıin saılandy.
