Qazaqstandyq taekvondoshy Olımpıada chempıonyn utty
ASTANA. QazAqparat - Qazaqstandyq Smaıyl Dúısebaı Fýdjaıra (BAÁ) taekvondodan ótip jatqan Gran-prı jarysynyń qorytyndy kezeńinde jartylaı fınalǵa shyqty, dep habarlaıdy QazAqparat tilshisi.
Qazaqstan Ulttyq olımpıada komıtetinen málim etkenindeı, S.Dúısebaı 87 kelige deıin salmaqta sátti óner kórsetip, qos birdeı jeńisine qol jetkizdi.
Qazaqstandyq taekvondoshy alǵashqy aınalymda Rıo Olımpıadasynyń chempıony, Ázerbaıjan eliniń ókili Radık Isaevtan basym tústi. Sodan keıin S.Dúısebaıǵa álem chempıony, germanııalyq Aleksandr Bachman da qarsy tura almady.
Jartylaı fınalda S.Dúısebaı ońtústikkoreıalyq, Azııa chempıony Ke Do Inmen kezdesedi.
Eske sala keteıik, Smaıyl Dúısebaı - Gran-prı jarysynyń fınaldyq kezeńine Qazaqstannan qatysyp jatqan jalǵyz sportshy.
Fınaldyq doda jeńimpazyna 80 upaı beriledi. Bul - álem chempıonatynan keıingi ekinshi iri reıtıngilik týrnır.
Sondaı-aq Qazaqstan quramasy erler men áıelder arasynda 24-25 qarasha kúnderi aralas komandalyq álem kýbogyna qatysady.
