Qazaqstandyq taekvondoshy Koreıada ótken týrnırde júldeger atandy
ORAL. QazAqparat - Batysqazaqstandyq taekvondoshy Lıana Kýshkeeva Koreıanyń Chýnchon qalasynda ótken halyqaralyq týrnırde júldeger atandy, dep habarlaıdy «QazAqparat» tilshisi.
Onyń jattyqtyrýshysy Arslan Ordabaevtyń aıtýynsha, G2 reıtıngilik jarys bolyp esepteletin Koreıa open týrnırinde Lıana 52 kg salmaqta qola júldege qol jetkizdi.
Bul jýyrda 14 jasqa tolǵan, sportqa daryndy balalarǵa arnalǵan mamandandyrylǵan oblystyq mektep-ınternatynyń shákirti Lıana Kýshkeevanyń kezekti tabysy deýge bolady. Bıyl Oral qalasynda olımpıadalyq oıyn túrine jatatyn taekvondodan (WTF) kadetter arasyndaǵy el birinshiliginde top jarǵan Lıana odan keıin Máskeýde «Patrıot 2017» búkilreseılik týrnırinde qola júldege ıe boldy. Sosyn ótken maýsym aıynda Vetnamnyń Hoshımın qalasynda taekvondodan (WTF) ótken kadetter arasyndaǵy Azııa chempıonatynda altynnan alqa taqqan bolatyn.
