Qazaqstandyq taekvondoshy «Koreıa Oýpen» halyqaralyq týrnırinde kúmis enshiledi
ASTANA. QazAqparat - Koreıanyń Kendjý qalasynda álemniń 70-ten astam eliniń taekvondoshylarynyń basyn qosqan birinshilik ótýde, dep habarlady QR Taekvondo federatsııasynyń baspasóz qyzmetinen.
Áıelder arasynda 73 keli salmaq sanatynda jarys jolyna shyqqan sportshymyz Ferýza Ergeshova bastapqy kezdesýlerin óte sátti bastady. Ol Koreıa, Frantsııa sportshylaryn, jartylaı fınalda AQSh ókilin jarys jolynan yǵystyrdy. Al aqtyq kezdesýde 2012 jylǵy Olımpıada chempıony serbııalyq Mandıch Mılısaǵa 0:9 esebimen utylyp qaldy.
Qazaqstan ulttyq quramasy úshin Ferýzanyń bul jeńisi óte mańyzdy. Óıtkeni, buǵan deıin jarys jolyna shyqqan sportshylarymyzdyń barlyǵy da jeńilistiń aşy dámin tatqan edi. Alda áli de 2 jarys kúni bar.
