Qazaqstandyq taekvondoshy kadetter arasynda Azııa chempıony atandy
ORAL. QazAqparat - Vetnamnyń Hoshımın qalasynda taekvondodan (WTF) ótip jatqan kadetter arasyndaǵy Azııa chempıonatynda batysqazaqstandyq Lıana Kýshkeeva jeńimpaz atandy, dep habarlaıdy «QazAqparat» tilshisi.
Onyń jattyqtyrýshysy Arslan Ordabaevtyń aıtýynsha, 2003 jylǵy Lıana 51 kg salmaqta úsh kezdesý ótkizip, bárinde de jeńiske jetti. Fınalda ırandyq sportshyny 15:14 esebimen tize búktirdi.
Bórli aýdany Aqsaı qalasynda dúnıege kelgen L.Kýshkeeva qazirgi kezde Oraldaǵy sportqa daryndy balalarǵa arnalǵan mamandandyrylǵan oblystyq mektep-ınternatynda oqyp, jattyǵady. Ata-anasy qyzynyń taekvondomen dendep shuǵyldanýy úshin Oralǵa kóship kelgen, páter jaldap turady.
Eske sala keteıik, bıyl Oral qalasynda olımpıadalyq oıyn túrine jatatyn taekvondodan (WTF) kadetter arasyndaǵy el birinshiliginde top jarǵan Lıana odan keıin Máskeýde «Patrıot 2017» búkilreseılik týrnırinde qola júldeger atanǵan bolatyn. 
