Qazaqstandyq taekvondoshy Belgııada ótken týrnırde jeńiske jetti
NUR-SULTAN. QazAqparat - Taekvondodan Qazaqstan quramasynyń ókili Samırhon Ababakırov Belgian Open G2 týrnıriniń jeńimpazy atandy, dep habarlaıdy QazAqparat Sports.kz saıtyna silteme jasap.
Ol 58 kelige deıingi salmaqta úzdik atandy.
Samırhon birinshi aınalymda ıspandyq Isaak Blanko Pıneırodan basym tústi. Ekinshi aınalymda amerıkalyq Devıd Kım bizdiń sportshymyzǵa qarsylyq kórsete almady.
Jartylaı fınalǵa shyǵý úshin ótken beldesýde jerlesimiz belgııalyq Hedı Neffatıden myqty bolyp shyqty.
Jartylaı fınaldyq kezdesýde qazaqstandyq sportshy 2021 jylǵy Eýropa chempıony frantsýz Sırıan Raveden basym tústi. Ababakırov fınalda avstralııalyq Beılı Lıýısti jeńip, osy týrnırdiń chempıony atandy.
Osy jeńisiniń arqasynda Ababakırov halyqaralyq reıtıngte kóterilýine septigin tıgizetin 20 upaıǵa ıe boldy.
