Qazaqstandyq taekvondoshy álemdik reıtıngide kósh bastady
NUR-SULTAN. QazAqparat – Qazaqstandyq taekvondoshy Jansel Denız jańartylǵan álemdik reıtıngide kósh basyna kóterildi, dep habarlaıdy QazAqparat tilshisi.
Bul Qazaqstan taekvondosy tarıhynda tuńǵysh ret bolyp otyr.
Áıelder arasynda 73 kelige deıingi salmaqta Denız 139.81 balmen birinshi orynda keledi. Reseılik Polına Han (107.94) ekinshi, ońtústikkoreıalyq Da Bın Lı (105.60) úshinshi satyda.
Jansel burynǵy nusqada tórtinshi orynda edi.
Óz sporttyq jolynda Denız 2017 jyly Taıbeıde jazǵy ýnıversıadada jáne 2018 jyly Djakartada (Indonezııa) ótken Azııa oıyndarynda kúmis medalǵa qol jetkizdi. Sondaı-aq ol – túrli halyqaralyq týrnırlerdiń chempıony hám júldegeri.
«Meniń armanym alysta bolyp kóringenimen, ol oryndaldy. Men búgin shyqqan jańartylǵan álemdik reıtıngide birinshi orynǵa ıe boldym. Bul Qazaqstan taekvondosy tarıhynda alǵash ret bolyp otyr. Men jalǵyz janashyrym – anama alǵys aıtqym keledi. Ókinishke qaraı, jolymda jeńilister, satqyndyq, aldaý da az bolǵan joq. Biraq, Álhamdýlıllah, men osyndamyn. Qýanyshymdy bóliskenderdiń bárine rahmet. Sondaı-aq barlyq musylman qaýymyn qasıetti Ramazan aıynyń bastalýymen quttyqtaımyn. Duǵa-tilekterińiz qabyl bolsyn!
P.S. Myna sýretke 10 jyl buryn túsip edim. Maǵan óz armanymdy jazýdy ótingen. Men álemde №1 bolǵym keledi dep jazdym», dep jazdy Jansel Denız Instagram-daǵy paraqshasynda.
