Qazaqstandyq taekvandoshylar London olımpıadasyna taǵy eki joldama utyp aldy
ASTANA. 28 qarasha. QazAqparat - Taılandta ótken lıtsenzııalyq jarysta taekvando sheberleri Nusultan Mamaev pen Gúlnafız Aıtmuhambetova Qazaqstan qorjynyna 2012 jylǵy London olımpıadasynyń eki joldamasyn saldy.
Endi Qazaqstanda úsh olımpıada lıtsenzııasy bar. Qaırat Qyrǵyzbaevtyń basshylyǵymen elimizdiń taekvando quramasy 2012 jyldyń shilde-tamyz aralyǵynda ótetin London olımpıadasy qarsańynda qoıǵan mindetterdi tolyqtaı oryndap shyqty.
Bul jarysta Beıjiń olımpıadasynyń qola júldegeri Shyńǵys Shylmanovqa sáttilik jetispedi. Ol óziniń ekinshi jazǵy olımpıadalyq oıyndaryna arnalǵan joldamany utýǵa bir qadam qalǵan tusta qarsylasyna jol berdi. Degenmen olardyń izin basqan qazaqstandyq taekvandoshylardyń jańa býyny úlken belesterdi baǵyndyrýda. Máselen, Shymkent qalasynyń týmasy N. Mamaev 2010 jyly Sıngapýrda ótken Birinshi jasóspirimder arasyndaǵy Olımpıada oıyndarynyń kúmis júldesin jeńip alǵan bolatyn.
