Qazaqstandyq sýretshilerdiń kórmesi Túrkııa qalalaryn «aralap júr»
Kórme Túrkııa astanasy Ankaradan keıin (14-24 qarasha), 26 qarasha kúni baýyrlas eldiń tórtinshi iri qalasy Býrsada ashyldy.
Býrsalyqtar men qala qonaqtaryna qazaq beıneleý óneriniń metrleri - Evgenıı Sıdorkın, Ábdiráshıt Sydyhanov, Dýlat Álıev, Ǵanı Baıanov, Baqyt Bápishevterdiń, sondaı-aq Marat Bekeev, Shámil Gúlıev, Nellı Býbe, Asqar Esdáýlet, Almagúl Meńdibaeva, Andreı Noda, Gúljamal Tagenova, Alpysbaı Qazǵulov, Vıacheslav Lıýı-Ko syndy talantty sýretshilerdiń qylqalamynan týǵan 32 keskindeme jáne grafıka týyndysy usynyldy.
QR Prezıdenti Nursultan Nazarbaev «Uly dalanyń jeti qyry» maqalasynda aıtqandaı: «Qazaqstan - kúlli túrki halyqtarynyń qasıetti «Qara shańyraǵy». Búgingi qazaqtyń saıyn dalasynan álemniń ár túkpirine taraǵan túrki tektes taıpalar men halyqtar basqa elder men óńirlerdiń tarıhı úderisterine eleýli úles qosty».
Ábilhan Qasteev atyndaǵy memlekettik óner mýzeıi - Qazaqstannyń eń iri kórkem murajaıy. Qazaq beıneleý óneriniń álemdegi eń úlken kollektsııasy osynda shoǵyrlanǵan. «Qazaq dalasynyń rýhy» kórmesi kóshpendiler mádenıetiniń ózindik erekshelikterin, qazaqtyń turmys-tirshiligin, ulttyq oıyndaryn, salt-dástúrleri men ádet-ǵurpyn kórsetedi.
«Nursultan Nazarbaevtyń «Uly dalanyń jeti qyry» atty jańa maqalasy asa ózekti ári der kezinde jasalǵan zertteý boldy. Onda ulttyq mádenıettiń, rýhanııattyń, tarıhı jáne kórkemdik muralardyń qundylyǵy men mańyzy ashyp kórsetildi. Shet memleketterde kórmeler uıymdastyrý arqyly Qasteev atyndaǵy mýzeı talantty qazaq sýretshileri men qazaq ónerin halyqaralyq deńgeıde nasıhattap, ulttyq mádenıetimizdi, tarıhymyzdy, qazaqtyń beıneleý ónerin álemge tanytpaq», - deıdi mýzeıdiń dırektory, professor Gúlmıra Shalabaeva.
Kórmeni QR Mádenıet jáne sport mınıstrligi halyqaralyq TÚRKSOI uıymy jáne Á. Qasteev atyndaǵy memlekettik óner mýzeıimen yntymaqtastyqta uıymdastyryp otyr.