Qazaqstandyq sýretshiler Qıǵash ózenindegi alyp gúldi kenepke beınelep jatyr

ATYRAÝ. QazAqparat – Atyraýda 4 óńirdiń sýretshileri sý ústinde ósip turǵan lotosty kenepke beınelep jatyr, dep habarlaıdy QazAqparat tilshisi.

Sýretshilerdiń respýblıkalyq planeri «Sý ústindegi sulýlyq» dep atalǵan. Sh.Sarıev atyndaǵy kórkemsýret jáne qoldanbaly sándik óner mýzeıiniń uıymdastyrýymen ótip jatqan planerge Almaty, Qyzylorda, Aqtóbe jáne Atyraý oblysynan 10 qylqalam sheberi qatysýda.

Mýzeı basshysy Tólegen Orynbasarulynyń aıtýynsha, sýretshiler Qurmanǵazy aýdanyndaǵy Qıǵash ózeni ústinde ósetin lotosty kenepke beıneleýde.

«Qıǵash ózeniniń ústinde lotos gúldeıdi. Ony tek qazaqstandyqtar ǵana emes, ózge elderdiń týrısteri de qyzyǵa tamashalaıdy. Sol sebepten, sý ústindegi sulýlyqtyń sýretshilerdiń qylqalamyna arqaý bolǵanyn qaladyq», - deıdi Tólegen Orynbasaruly.

Onyń sózinshe, 4 tamyzda atalǵan mýzeıde lotosty beınelegen sýretshilerdiń kórmesi ótedi.

Lotos – Qıǵash ózeniniń saǵasynda ǵana gúldeıtin sırek ósimdik. Al Qıǵash ózeni Atyraý oblysynyń Qurmanǵazy aýdany men Reseıdiń Astrahan óńiriniń shekarasynda aǵyp jatyr.

Qıǵash ózenine «Aqtóbe – Atyraý – Reseı Federatsııasynyń shekarasy» baǵytyndaǵy jolmen jetýge bolady. Atyraýdan araqashyqtyq – 300 shaqyrymǵa jýyq.

Qyzǵylt tústi, bıiktigi 150 santımetrge deıin jetetin lotos 5 myń gektarǵa jýyq aýmaqta gúldeıdi. Sý ortasynda tańerteń qaýyzyn ashyp, keshke qaıta jabady.

Bul gúldi úndister men vetnamdyqtar tazalyqtyń sımvoly retinde baǵalaıdy. Tipti onyń emdik qasıeti bar dep esepteledi. Tuqymyndaǵy aqýyz búırek pen kókbaýyr, júrek aýrýy men uıqysyzdyqty emdeýge qoldanylady.

Eske sala ketelik, byltyr Atyraý oblysyndaǵy Qıǵash ózeniniń saǵasynda lotos gúldegenin jazǵan edik.