Qazaqstandyq sýretshi Japonııadaǵy baıqaýda top jardy
ÓSKEMEN. QazAqparat - Óskemendegi Teńge saraıynyń qyzmetkeri Japonııada ótken halyqaralyq sýretshiler baıqaýynda top jardy, dep habarlaıdy QazAqparat tilshisi.
Japonııanyń Osaka qalasyndaǵy Teńge saraıy uıymdastyrǵan halyqaralyq konkýrsta óskemendik sýretshi Anastasııa Sachenok birinshi oryn aldy.
Konkýrs sharty boıynsha sýretshiler ózderi jobalaǵan tıynnyń naqyshtalǵan nusqasy men elektrondy nusqasyn ótkizýi tıis bolǵan. Al tıynnyń betindegi bederler tarıh men tehnıkalyq progrestiń úndestigin, ekologııalyq máselelerdi qamtýy kerek bolǵan.
«Men salǵan sýretti naqyshtaýǵa Dıdar men Erǵalı deıtin áriptesterim kómektesti. Jeńimpaz atanýyma olardyń da minsiz jumys isteýi septigin tıgizdi» - deıdi jas sýretshi.
Anastasııa jobalaǵan tıynnyń bir jaq betine búkil adamzat tarıhynyń evolıýtsııasy beınelense, ekinshi betine san túrli japyraqtardyń qorshaýyndaǵy ǵalamshar salynypty.
Konkýrsqa álemniń ár túkpirinen 200-den astam kásibı jáne áýesqoı srýetshiler qatysqan. Úzdik bestikke Úndistan, Shveıtsarııa, Italııa jáne Reseı eliniń sýretshileri kirgen.
